04/12/2024
السلام عليكم ورحمة الله
إنهاردة هنتكلم "سريعاً" عن لوحة الكهربا الرئيسية إللى بتبقى موجودة فى أى منزل أو منشأة و إحنا بنتكلم عن المنازل طبعاً .
إللى فى الصورة مثال للوحة الكهربا و طبعاً ببختلف حجمها على حسب عدد المفاتيح و حجم المنزل بطبيعة الحال .
كل مفتاح بيبقى ليه قدرة تحمل قصوى مقاسة بالأمبير إللى هو شدة التيار .يعنى المفتاح إللى عليه تكييف بيبقى قدرة تحمله أكثر شوية من غيره و ممكن يبقى أغلى حاجة بسيطة .
و لازم يبقى فيه مفتاح رئيسى يفصل التيار عن المنزل كله مرة واحدة ..
بالنسبة للتكييفات أنا من أنصار أعمل سلك منفصل و مفتاح منفصل لكل تكييف خاصة لو كان التكييف قدراته عالية ..و لكن حالياً مع وجود التكييف الإنفرتر و الإضاءة الليد إللى بيسحبوا كهربا بشكل أقل من الأنظمة القديمة ممكن يكون مع التكييف أحمال أخرى بسيطة ... وجود مفتاح منفصل فى اللوحة أنا شايف إنه بيغنينى إنى أعمل مفتاح فى الحائط لكل تكييف و إن كان حالياً فيه مفاتيح قدرات عالية نفس شكل مفتاح الإضاءة العادى إللى فى الحائط و لكن بقدرات أكبر .
زى ما قلنا قبل كده ، بنفضل شكل علبة اللوحة الرئيسية يكون بلاستك كما فى الصورة لأنه بيكون أشيك بكتير و أنسب من اللوحة المعدن خصوصاً لو اللوحة راكبة فى الريسيبشن مثلاً بيكون الشكل ده أفضل بكتير
