09/11/2025
( لمى النعمه تلمك و تطرح البركة في بيتك)
عروق الكرنب أوعى ترميها قطعيها وحطيها فى برطمان وحطى ملح وليمون وكام يوم هتاكلى أحلى مخلل. .
قشر الليمون ده ممكن تعملى فيه كذا حاجه جمعيه وخلليه او اغليه فى شويه ميه وزودى بيه صابون المواعين او اغسلى بيه السيراميك او انقعى فيه الملابس البيضااو حطى عليه شوية خل وتغسلى بيه عيون البوتاجاز.
قلب الباذنجان اللى بتقوريه شوحيه فى معلقه زيت واضربيه مع فلفل اخضر ومعلقتين زبادى وطحينه وشوية بقدونس واعمليه بابا غنوج.
احفظى وش اللبن وجمعيه فى الفريزر واعملى منه قشده لاي استخدام بعد كده تفيدك.
اعملى الطحينه فى البيت سمسم ودقيق وزيت و دمسى الفول فى البيت للفطار.
الرز الباقى ممكن تعمليه رز معمر مع قطعتين لحمه او ربع فرخه ولبن ودخليه الفرن او تشليه لما تعملى كشرى او تفرميه مع الكفته.
اتبقى سمكه مقليه شليها ولما تعملى تانى طلعيها فى صنيه مع بصل وطماطم وليمون.
بواقى الكيك اللى بينشف ممكن تفرميه وتعمليه ترافيل بالشيكولاته.
قشر البرتقال اليوسفى بيتحط فى المش بيديله طعم جميل وممكن تنشفيه وتطحنيه بيعمل ريحه روووعه فى البيت.
المكرونه الباقيه حطيها فى الفريزر وفى اى يوم طلعيها فى صنيه وعليها معلقه صلصه ع الوش ودخليها الفرن وجنبها بطاطس محمره وسلطه.
لو اللبن راب وقطع صفيه واعمليه جبنه قريش.
بواقى الجبنه اللى بتنشف اضربيها فى الكبه مع معلقه قشطه هتبقى جبنه كريمى ومع طماطم او فلفل اخضر او زيتون.
الطبيخ اللى بيتبقى جمعى كل نوع لوحده واخر الاسبوع اعمليه تورلى.
البرتقال هاتيه وتعصريه يدوى وتخزنيه مع جزر يبقه احلى عصير.
جزر أو خيار دبلان قطعيه فى برطمان وميه وملح وليمون واعمليه مخلل
جمعى الأجنحة والكبد والقوانص ممكن تعملى اكله بيهم او تحطيهم فى حلة محشى.
لما يجي موسم الخس ده هاتيه وتنظيفه ومتغسلهوش عشان ميسودش لفيهفى فوطة ولماتحبى تاكليه تطلعيه وانقعيه بماء وخل كأنه طازة.
بواقى الفراخ او اللحمة قطعها وممكن تعملى بيها شاورما اوتعملى بيها سندوتشات.
صلوا على الحبيب 🤎
