Mas for decoration and construction

12/10/2026

(الف باء تشطيب)
لو وصلت لمرحلة البلاط افتكر ان مش كل الانواع بتتركب بنفس الطريقه بتختلف حسب مقاس ونوع البلاطة سواء سيراميك او بورسلين هتقولى ازاى هقولك ..
البلاط السيراميك العادى بيتركب بمونة اسمنتيه كالمعتاد بس اختار صنايعى صح وبلاش تسترخص علشان الفواصل واللحامات وبلاش تسترخص برضه فى سعر البلاطه والفرز علشان جودة البلاط بتفرق
انا بقى لو اخترت بورسلين فده له معامله خاصة شويه بدابة من ٦٠*٦٠ لخد اكبر مقاس اللى بيوصل احيانا ل٣ متر فى الطول .. طيب هنركب ازاى هقولك
البورسلين ممكن يركب زى البلاط العادى بمونة بس بنضيفله شوية حاجات علشان ميفصلش ولا يطبلش زى اننا بنعمل مونة مفلفله مثلا تحته وممكن ندهن ضهر البلاط بماده عادى عالمونة وممكن نضيف شوية اديبوند علشان منمحرش الارضيه ونكلف العميل وطلعا متنساش الكلبسات والمشابك علشان تظبط البلاط والفواصل واهم من ده كله الصنايعى يكون تمام ..
باقى الانواع فى البوست الجاى ان شاء الله ....

11/10/2026

👤 الاسم: المهندس سمير صبري

🎂 العمر: 51 سنة

📍 العنوان: بلقاس، محافظة الدقهلية

💼 المهنة: مالك ومدير شركة ماس للمقاولات العامة والديكور 🏗️

---

🌟 المسيرة والطموح

يُعد المهندس سمير صبري من الشخصيات البارزة في مجال المقاولات والديكور، حيث استطاع من خلال خبرته الطويلة ورؤيته المهنية أن يؤسس ويدير شركة ماس للمقاولات العامة والديكور، مقدمًا العديد من الأعمال المتميزة التي تجمع بين الجودة والإبداع والدقة في التنفيذ.

ويؤمن بأن النجاح في مجال التشييد والديكور يعتمد على التخطيط السليم والالتزام بأعلى معايير الجودة، لذلك يحرص دائمًا على تطوير أعماله ومواكبة أحدث الأساليب الهندسية والتصميمية.

---

🛠️ الخبرات والمهارات

• خبرة واسعة في مجال المقاولات العامة.

• إدارة وتنفيذ المشروعات الإنشائية والتشطيبات.

• الإشراف على أعمال الديكور والتصميم الداخلي.

• القدرة على قيادة فرق العمل وتحقيق أفضل النتائج.

• الالتزام بمعايير الجودة والاحترافية في التنفيذ.

• السعي المستمر للتطوير والابتكار في مجال العمل.

---

🎯 الصفات الشخصية

• طموح وصاحب رؤية مهنية متميزة.

• يتمتع بروح القيادة وتحمل المسؤولية.

• ملتزم ومنظم في إدارة أعماله.

• يتميز بالخبرة والحكمة في اتخاذ القرارات.

• متعاون ويحسن التعامل مع الآخرين.

• يحظى بالاحترام والتقدير بين العملاء وزملاء المهنة.

---

🏆 النموذج المشرف

يُعتبر المهندس سمير صبري نموذجًا مشرفًا للشخصيات الناجحة في مجال المقاولات والديكور، حيث استطاع أن يبني مسيرة مهنية متميزة من خلال العمل الجاد والخبرة والإبداع، ليصبح مثالًا يحتذى به في القيادة والنجاح وتحقيق الإنجازات.

---

📌 كل الاحترام والتقدير من صفحة شخصيات مصر المشرفة 🇪🇬✨🏆

09/10/2026

06/10/2026

(الف باء تشطيب)
خلصت بلاطك وسقفك وعايز تبدء فى الديكور بتاع الشقه
شوية نصايح كده عالماشى :
لو ناوى تعمل تجاليد عالحيطان خليك قى الخشب وابعد عن الجيبسمبورد علشان متزعلش بعدين خصوصا لو مكان فيه حركة ومياه ..
خليك بسيط دايما فى اختياراتك وحدد عايز انهى استايل علشان شغلك يطلع شكله حلو
لو هتعمل بانوهات ظبط النسب وحدد الاماكن صح وشوف هتمشى على انهى استايل لان نفس البانوهات ممكن تخليها مودرن وممكن نيو كلاسيك وممكن كلاسيك صريح
واخيرا بلاش لعب كتير فى الديكورات والالوان كفايه لون بدرجاته او لونين بالكتير
ومتنساش ان الشياكة والرقه فى البساطة دايما ....

05/10/2026

(الف باء تشطيب)
محتار تعمل البلاط الاول ولا تأسس النقاشه انا هقولك
اعمل الاول تأسيس النقاشة بتاع الحوائط والاسقف ووقفها على البطانة وبعدين بلط وبعد البلاط هات روول كرتون وغطى بلاطك كويس وبعدين كمل بنود التشطيب بتاعتك وبكده تكون حافظت على البلاط من المعجون اللى هيقع عليه ..
اتمنى اكون فيدتكم ومتنسونيش من دعائكم ...

05/10/2026

📢 مطلوب صنايعية جميع الفئات للعمل والانضمام لفريقنا 👷‍♂️👷‍♀️

يعلن مكتب ماس للمقاولات العامة والديكور عن حاجته إلى صنايعية جميع التخصصات والفئات للانضمام إلى فريق العمل.

🔹 شروط التقديم:
✅ الجدية في العمل
✅ الإتقان والمهارة
✅ الأمانة والالتزام
✅ القدرة على العمل ضمن فريق

📍 المقابلات يوميًا بعد صلاة العشاء
📌 العنوان: برج الليثي – أول شارع فلسطين – الدور الخامس

📞 للاستفسار والتواصل:
01005605907

⭐ لو عندك حرفة ومهارة وبتدور على شغل مستقر، انضم لفريق ماس.
ماس للمقاولات العامة والديكور — إتقان في التنفيذ وثقة في التعامل.

04/10/2026

( الف باء تشطيب)
متنساش قبل ماتعمل المحارة تركب حلوق الشبابيك والابواب واتاكد من الوزنة بتاعتك علشان هتبنى عليها كل مراحل التشطيب اللى جايه ...

30/09/2026

(الف باء تشطيب )
وانت بتعمل الجيبسمبورد متتخدعش فى السعر القليل علشان متزعلش بعدين .. اصلها معادله
سعر قليل يعنى خامات رديئة وحديد تثبيت قليل وضعيف
اختار صنايعى شاطر وبيتقى ربنا واعمل جبس كنوف ده افضلهم او جيبورد او عثمان ايا كان المسمى بس اللوح يكون انتاج حديث ومش مرطب وخلى الحديد ٤. والمسافات من ٥٠ ل٦٠ سم ومتنساش تعلق الصنايعى فى شبكة الحديد قبل مايقفل الجبس ..
اه ونسيت اقولك طبعا وزنة السقف قبل اى شغل علشان شغلك يطلع مظبوط وشكله حلو
وابعد بقى عن الرسومات الكتبر والزحمة فى السقف اصلها معروفه .. الشياكة فى البساطة ..

28/09/2026

معلومة النهارده من (الف باء تشطيب) ممكن تتعمل بتكلفة عاليه او متوسطة طيب ازاى هقولك دلوقتى :
انا بتكلم عن بند المحارة والبند ده يعتبر الاساس لكل شىء جاى بعده فلو متعملش صح اعرف ان اللى جاى كله مش احسن حاجة.. طيب ازاى نقدر نوفر فيه او لا هقولك
لو انت هتعمل ديكور عندك على الحوائط والاعمدة زى تجاليد او ماشابه فلازم تعمل بؤج واوتار وتأكس وتوزن وتأسس للمحارة مظبوطة وده تكلفته كخامة ومصنعيه عاليه ..
طيب لو شغل الديكورات عندك خفيف هتشوف صنايعى شاطر وفاهم وهيعملك الشغل دراع وميزان واستلم منه عاللمبة والدراع ولو هو صنايعى فاهم هيطلعلك الحيطة زى مالكتاب بيقول وبكده هتكون وفرت نص التكلفه تقريبا ..
اه ومتنساش قبل ده كله دق السلك على الفواصل ومكان تكسير الكهربا علشان الحوائط متنسمش ولا تشرخ بعدين
ودى كانت معلومتنا النهارده ويارب اكون فيدتكم ....

27/09/2026

(الف باء تشطيب)
بند العزل مبقاش رفاهيه او اختيارى احمى نفسك وجارك من اى تسريب ممكن يحصل فى اى وقت بانك تعزل الحمامات والمطابخ وكمان البلكونات لو فيها بلاعات
العزل لازم يتم بمواد قوية وخاصة بالعزل ويكون فنى فاهم يعزل ازاى والعزل يتم بسيكا ١٠٧ وشين عكس بعض وبعدها اعمل اختبار بالميه علشان تتاكد ان عزلك مظبوط ...