26/06/2026
25 ივნისი, 2026 — დღე, როდესაც ტრადიციას საფუძველი ჩაეყარა. 🤍
დღეს ისტორიას კიდევ ერთი ლამაზი ფურცელი შეემატა. გაიმართა პირველი თექის ფესტივალი „მატყლიდან ხელოვნებამდე“ — დღე, რომელიც, გვჯერა, მრავალწლიანი ტრადიციის დასაწყისი გახდა.
ფესტივალის იდეა ეკუთვნის ქსრთული თექის ასოციაციის დამფუძნებელს სიდონია ბერიძეს, რომლის ირგვლივაც გაერთიანდნენ მეგობრები, თანამოაზრეები და ქართველი მეწარმეები. საერთო ძალისხმევით, სიყვარულითა და ენთუზიაზმით პირველი ფესტივალი რეალობად იქცა.
ღონისძიებაში მონაწილეობდნენ ოსტატები კახეთიდან, თუშეთიდან, მესხეთიდან, რაჭიდან და თბილისიდან. თითოეულმა მათგანმა დამთვალიერებელს გაუზიარა თავისი გამოცდილება, ტრადიცია და ხელოვნება. ყველა მონაწილეს გადაეცა მონაწილეობის სერტიფიკატი — მადლიერების სიმბოლო იმ საქმისთვის, რომელსაც ისინი ყოველდღიურად ემსახურებიან.
ჩვენთვის განსაკუთრებული პატივი იყო, რომ ფესტივალის მთავარი მხარდამჭერი გახდა „საოჯახო სამხატვრო გალერეა“, ხოლო პირადად მე ნატალია სირაძეს მომეცა შესაძლებლობა, ვყოფილიყავი ამ ისტორიული დღის წამყვანი და მონაწილე.
განსაკუთრებული სიხარული და პატივი იყო ჩვენს შორის გვეხილა ქალბატონი ნანული აზიკური — ისტორიის დოქტორი, ეთნოლოგი, ქართული მატყლის, ტექსტილისა და ტრადიციული კულტურის ერთ-ერთი გამორჩეული მკვლევარი. მისი მრავალწლიანი სამეცნიერო და საზოგადოებრივი საქმიანობა ფასდაუდებელ წვლილს წარმოადგენს ქართული კულტურული მემკვიდრეობის შესწავლაში, შენარჩუნებასა და მომავალი თაობებისთვის გადაცემაში. მისი დასწრება ჩვენი ფესტივალისთვის უდიდესი პატივი და ღირსება იყო.
გულითად მადლობას ვუხდით ყველა მონაწილეს, რომლებმაც თავიანთი შრომითა და სიყვარულით შექმნეს ეს დღე:
სიდონია ბერიძე, დეა შემოზაშვილი, ლია მამიაშვილი, მარი სოზაშვილი, რუსუდან ცოფურაშვილი, ეკატერინე მელაშვილი, თამრიკო ხალვაში, თამარ თამარაძე, ეკატერინა ჩადუნელი, ხათუნა მაღრაძე, ლალი კურტანიძე, ნანა ნათენაძე, შორენა ხუროშვილი, ბელა პაპავა, ნათია ქისტაური, ირინა ჯინჭარაძე, ირმა კოვზიაშვილი, ჯაბა ჭუმბურიძე, ლილინა მაისურაძე, ნინო სხირტლაძე, ნუგზარ ძამუკაშვილი და ქრისტინე ლონგიშვილი.
ქართული ტრადიციული ხელოვნება იმსახურებს საზოგადოების განსაკუთრებულ ყურადღებას.
გვჯერა, რომ „მატყლიდან ხელოვნებამდე“ აღარ იქნება მხოლოდ ერთი დღის ღონისძიება. ეს გახდება ყოველწლიური ფესტივალი, რომელიც ყოველ ჯერზე უფრო მასშტაბური იქნება, გააერთიანებს საქართველოს ყველა რეგიონს, თექისა და მატყლის ოსტატებს, ხელოვანებსა და ხელსაქმის მოყვარულებს.
ვიცით, რომ წლევანდელ ფესტივალში მონაწილეობის სურვილი ბევრ ადამიანს ჰქონდა, თუმცა დროის სიმცირის გამო ყველასთან დაკავშირება ვერ მოხერხდა. ამიტომ უკვე დღესვე ვამბობთ — მომავალ წელს ჩვენი კარი ღია იქნება ყველა მსურველისთვის, რათა კიდევ უფრო მრავალფეროვანი და მასშტაბური ფესტივალი შევქმნათ.
დღეს ჩვენ მხოლოდ ფესტივალი არ ჩავატარეთ.
დღეს საფუძველი ჩავუყარეთ ტრადიციას, რომელიც, გვჯერა, ათწლეულებსა და საუკუნეებს გაუძლებს, გააერთიანებს თაობებს და მსოფლიოს კიდევ ერთხელ გააცნობს ქართული მატყლის, თექისა და ტრადიციული რეწვის უნიკალურ კულტურას.
შევხვდებით მომავალ წელს — კიდევ უფრო დიდ, მრავალფეროვან და ძლიერ ფესტივალზე „მატყლიდან ხელოვნებამდე“. 🤍🇬🇪
