عيادة الدكتور أحمد آل حربي لطب الاطفال

14/04/2026

خلع الورك الولادي.

11/04/2026

28/03/2026

موضوع مهم وشائع ومنقذ للحياة !
شلون تتصرفون إذا غص الطفل الرضيع؟
الخطوات:
ابقوا هادئين : الخوف ما راح يساعد، الطفل محتاج تتصرفون بسرعة.
اول شي الضربات على الظهر: نوموا الطفل على إيدك ووجهه ليجوه (باتجاه الأرض)، واضربوا 5 ضربات خفيفة بين الاكتاف براحة إيدك.
ثاني شي الضغطات على الصدر: إذا ما طلع الشي اللي غاص بيه، اگلبوا على ظهره واضغطوا 5 مرات على منتصف صدره بإصبعين.
تكرار: نعيد الخطوات لحد ما يطلع الجسم الغريب أو يبدأ الطفل يبجي ويتنفس.
ونروح باسرع ما يمكن للطوارئ.
تحذير مهم 🚫:
لا تخلون اي اصبع بحلگ الطفل (خصوصا اذا ما شايف الجسم الغريب وهذا يسمونه مسح اعمى ) لأن ممكن تدفعون الشي ليجوه أكثر!

د. احمد آل حربي
#طفل #ام #صحة #الخضر #السماوة #اختناق #طوارى

26/03/2026

بهاي الاجواء تزيد نوبات الربو والحساسية، اليوم نحچي عن الربو اما الحساسية فنحچي عنها بمنشور ثاني.
نوبات الربو شنو هي؟
📍نوبة الربو هي تضيق مفاجئ بالشعب الهوائية بسبب التهاب + تشنج بالعضلات + زيادة إفراز المخاط، وهذا يخلي الطفل أو البالغ يحس بضيق نفس، صفير (أزيز)، وگحّة.

🚨شلون تلاحظ النوبة؟
📌ضيق نفس واضح (يتعب بالتنفس)
📌صفير بالصدر (خصوصًا بالزفير)
📌گحة متكررة، خاصة بالليل
📌ثقل أو شد بالصدر
🚨بالحالات الشديدة: الطفل ما يگدر يحچي أو يشرب، أو ممكن يصير خامل
✅شنو يسبب النوبات؟
📍التراب و الدخان و الروائح القوية
📍الزكام والفايروسات والنشلة
📍الجو البارد
📍الحساسية (غبار، عطور، حيوانات)
📍الجهد الزائد أحيانا
🚨شلون تتصرف وقت النوبة؟ (المهم)
1. خلي المريض يگعد بوضعية مريحة (مو نايم)
2. استعمل البخاخ مالته بحسب جرعته المعتادة
3. راقب التحسن خلال 10–15 دقائق

🔴 شوكت نخاف ونروح للطوارئ؟

1.ماكو تحسن بعد البخاخ
2.التنفس سريع جدًا أو صعب
3.الطفل ما يكدر يحچي أو يشرب
4.ازرقاق بالشفايف
5.استخدام عضلات إضافية بالتنفس (صدره ينسحب للداخل)

الربو مرض ممكن نسيطر عليه إذا تعاملنا وياه بسرعة وبطريقة صحيحة. التأخير هو اللي يحوّل النوبة من بسيطة إلى خطيرة.
××وشيلو من بالكم سالفة ادمان على البخاخ ماكو هيچ شي.
#الخضر #السماوة #ربو #تنك #مطر #صحة #ام #طفل #طفلي #كحة #سعال.

24/03/2026

الاسهال عند الاطفال.
اخوان يصير عند الاطفال اسهال وهذا عادي ومو غريب وما ننخبص وما نروح وره سوالف الخرافات (مستورح وشامم وماعرف شنو) وناخذه لعارف مدري عارفه وينطي امور ما معروفه شنو وممكن تسمم وتبقي مشاكل للطفل عمره كله وتعال اچوي واحرگ وسوالف ما انزل الله بها من سلطان.
احنا من نشوف ذني:
1.خروج لين كلش /مائي اكثر من 3 مرات خلال 24 ساعه
2.دم وي الخروج
3.كمية خروج لين/مائي مو طبيعيه يعني غير عن عادة الطفل
لازم نلاحظ ذني هم :
1.عيونه غايرة
2.الطفل خامل على غير عادة
3.بولته قليله
4.حلگه ناشف ويبچي بدون دموع
5.ما يگدر يشرب
6.يتقيء اي شي يشربه او ياكله
هنا نراجع مختص حتى نعرف شكو وشلون نتعامل.
اللي لازم نسويه اذا ما شفنا العلامات سالفة الذكر :
1.نزيد الرضاعه وشرب السوائل
2.ننطي محلول ORS
3.نراقب الطفل
اللي ما يصير هو :
1.ننطي مضاد حيوي من يمنا
2.نگطع عنه الاكل او الرضاعه
وبالاخير اگلكم الطفل امانة عدكم ويحتاج هواي صبر وطولة بال.
#الخضر #السماوة #طب #اطفال #ام #اسهال #تقيء #رعاية #حمى #تربية

23/03/2026

ديروا بالكم على اطفالكم، لاتعرضوهم للخرافات وربوهم صحيح على الحب والتسامح ونبذ الكره.

الامهات تره الطفل اللي اليوم بحضنچ ويحتاجچ بكل لحظة، راح يكبر بسرعة أكثر مما تتصورين. يمكن هسه تشوفينه ما ينام إلا يمّچ، ويبچي إذا ابتعدتي عنه دقيقة، بس صدّگيني الأيام تمشي، وهاي اللحظات ما ترجع.

اهتمي بيه مو بس بالأكل والنوم، لكن بالكلمة الطيبة، بالحنان، وبالوكت اللي تگضينه وياه. الطفل يتربى على الشعور قبل كلشي، وإذا حس بالأمان وياچ، راح يكبر وهو قوي وواثق من نفسه.
لا تستهينين بابتسامة، حضن، أو كلمة “احبك”، لأن هاي الأشياء تبقى بداخله طول العمر.

يمكن تتعبين، ويمكن تمر عليچ أيام تحسين ما عندچ طاقة، بس تذكري إن هذا التعب هو اللي راح يصنع إنسان سوي بالمستقبل.
يوم من الأيام، راح يكبر ويصير عنده عالمه الخاص، أصدقاءه، ويمكن حتى عائلة خاصة بيه، وما راح يحتاجچ مثل هسه.

وهنا راح تحسين بفراغ غريب، وتشتاقين لهذي الأيام البسيطة. فحاولي تعيشين كل لحظة، لا تستعجلين كبره، وخلي ذكرياته وياچ مليانة حب ودفا.
لأن بالنهاية، الأم ما تخسر طفلها، لكنها تشوفه يكبر ويبتعد خطوة خطوة… ويبقى گلبها متعلق بيه طول العمر.
#طفل #الخضر #السماوة #اكسبلور

21/03/2026

التبول على الفراش او الملابس

1. شائع وطبيعي خصوصاً قبل عمر 5 سنوات، وغالباً يتحسن وحده بعد عمر 5 سنوات.

2. مو غلط الطفل ولا متعمد، لا توبيخ ولا عقوبه ولا صياح ولا بسط بالعكس من نسوي هيچ فاحنه ندخل الطفل بأزمة بحيث شي مو بيده ويتحاسب عليه هم تزيد الحالة وهم تسببله مشكلة نفسيه.

3.شنو نسوي بالبيت: تواليت قبل النوم، تقليل شرب السوائل مثل الماي و العصاير قبل النوم بساعة الى ساعتين (مو تقليل طول اليوم) والچاي ابو المشاكل هم عوفوه ، نخليه ينظف ويانه حتى يحس بالمسئولية، نمدح بالمحاولة يعني من يحاول او يگول وما يلحگ نگله عاشت ايدك المرة التجي احسن مو نحچي عليه ومن ما يطلع بول نگله عفيه .

4. شوكت تراجعونا : عمره 5 سنوات وفوك وماكو تحسن، أو تبول بالنهار، أو حرقان/ألم/دم بالبول، أو عطش قوي وكثرة تبول بالنهار، أو يرجع يبول بعد فترة 6 اشهر كان متحسن بيها او عنده امساك شديد.

د.أحمد آل حربي

#الخضر #السماوة #اكسبلور #طفل