20/06/2026
🚨 ကန့်လန့်ကာနောက်ကွယ်က သစ္စာအားမာန် (သို့မဟုတ်) "ဒီဇင်ဘာနှင်း" ဖွင့်မချခင်ကတည်းက ေ_သွးစွန်းခဲ့ရတဲ့ ဘောလုံးသမားဘဝများ
မြန်မာအမျိုးသမီးလိဂ် (MWL)ရဲ့ ထိပ်သီးအသင်းကြီးဖြစ်သလို၊ ပြည်ထဲရေးဝန်ကြီးဌာနကိုယ်စားပြု အသင်းတစ်သင်းဖြစ်တဲ့ "သစ္စာအားမာန်" အသင်းရဲ့ ကန့်လန့်ကာနောက်ကွယ်က စုတ်ပြတ်သတ်နေတဲ့ အမှန်တရားတွေဟာ အခုဆိုရင် လူမှုကွန်ရက်ပေါ်မှာ တရားဝင် ပေါက်ကွဲထွက်လာခဲ့ပါပြီ။
ဟိုတစ်နေ့က ပွဲပြီး Interview မှာ ကစားသမားလေး ဒီဇင်ဘာနှင်း ရဲ့ မျက်ရည်ဝဲလျက် ရဲဝံ့စွာ ဖြေကြားသွားခဲ့တဲ့ ဗီဒီယိုဖိုင် ဟာ တစ်နိုင်ငံလုံးကို ဆွံ့အသွားစေခဲ့ပါတယ်။ ဒါပေမဲ့ ပိုပြီး ရင်နာစရာကောင်းတဲ့ အမှန်တရားကတော့... ဒီပြဿနာဟာ အခုမှ ရုတ်တရက် ပေါ်ပေါက်လာတာမျိုး မဟုတ်ပါဘူး။
ဟိုးအရင် ခေတ်အဆက်ဆက်ကတည်းက တည်ရှိနေခဲ့ပြီး ကစားသမားတွေဟာ သူတို့ရဲ့ ဘဝ၊ သူတို့ရဲ့ အနာဂတ်တွေကို ဓားစာခံအဖြစ် အဆုံးရှုံးခံကာ ရင်ထဲမှာ မျိုသိပ်ခံစားခဲ့ရတဲ့ စနစ်ဆိုးကြီးရဲ့ ကင်ဆာကျိတ်တစ်ခု ဖြစ်ပါတယ်။
ဒီဇင်ဘာနှင်း ရဲရဲဝံ့ဝံ့ အော်ဟစ်လိုက်တဲ့ "ထမင်းတောင် နပ်မှန်အောင် မကျွေးနိုင်ဘူး" ဆိုတဲ့ အခြေခံစားဝတ်နေရေး ပြဿနာဟာ သစ္စာအားမာန်မှာ နှစ်ပေါင်းများစွာ အမြစ်တွယ်နေခဲ့တာပါ။ အသင်းမှာ ၉ နှစ်နီးပါး သက်တမ်းကို စတေးပြီး ဒုတိယ ၃ ဆု၊ ကြေး ၂ ဆုနဲ့ ဝန်ကြီးဌာန ရွှေတံဆိပ်ဆုတွေအထိ ယူပေးခဲ့တဲ့ ဒဏ်ရာကြောင့်အနားယူခဲ့ရတဲ့ အမျိုးသမီးလက်ရွေးစင်ဟောင်း တစ်ဦးရဲ့ ကိုယ်တွေ့ရင်ဖွင့်ချက်က သက်သေပါပဲ။
" ပြိုင်ပွဲသွားကန်ရင် မိမိတို့ကိုယ်ပိုင်ပိုက်ဆံနဲ့ ထမင်းအရင်ချက်စားရပြီးမှ အသင်းဆီ ပြန်တောင်းရပါတယ်။
တစ်ရက်စာ စရိတ်ကို ၃,၀၀၀ မှ ၅,၀၀၀ ကျပ်နှုန်းသာ သတ်မှတ်ပေးပြီး၊ အချို့ရက်တွေမှာ ထမင်းငတ်တဲ့အထိ အခြေခံ လူ့အခွင့်အရေး ချိုးဖောက်ခံခဲ့ရပါတယ်။
လိဂ်ပြိုင်ပွဲ ၅ ကြိမ် ကန်ပေးခဲ့တာမှာ ပထမတစ်ကြိမ်ပဲ ဆုကြေးရပြီး ကျန်တဲ့ ၄ ကြိမ်လုံး ဆုကြေးငွေ လုံးဝအဖြတ်တောက်ခံခဲ့ရပါတယ်။"
ကစားသမားတွေရဲ့ သွေး၊ ချွေးရင်းပြီး ရှာဖွေပေးခဲ့တဲ့ ဂုဏ်သိက္ခာတွေ၊ ဆုကြေးငွေတွေဟာ ကန့်လန့်ကာနောက်ကွယ်က လူကြီးတွေရဲ့ အိတ်ကပ်ထဲ ရောက်သွားခဲ့တာ ကြာပါပြီ။
ပြီးတော့ဘောလုံးသမားတစ်ဦးအတွက် အသက်ထက်အရေးကြီးတဲ့ ခန္ဓာကိုယ်နဲ့ ခြေထောက် ဒဏ်ရာရရှိမှုအပေါ် အသင်းဘက်က တာဝန်ယူမှု၊ တာဝန်ခံမှုကတော့ "သုည" ပါပဲ။
ထိုအမျိုးသမီးလက်ရွေးစင်ကစားသမားဟောင်းလေးဟာ သစ္စာအားမာန်မှာ ကန်ပေးနေရင်း ကစားသမားဘဝကို အဆုံးသတ်စေနိုင်တဲ့ ဒူးအရွတ် (ACL) ပျက်သွားတဲ့အခြေအနေမျိုးမှာတောင် အသင်းဘက်က လုံးဝဖေးမကူညီခဲ့ပါဘူး။ MRI ရိုက်ဖို့အတွက်တောင် မနည်းပြောရပြီး ကစားသမားက ကိုယ်ပိုင်ပိုက်ဆံ အကုန်အကျခံကာ ခွဲစိတ်ခဲ့ရပါတယ်။ သူမဟာ လက်ရွေးစင်အဆင့် ဖြစ်နေလို့သာ ထိုမျှလောက် အင်အားစိုက်ထုတ်ပြောဆိုနိုင်ခဲ့တာဖြစ်ပြီး၊ အသင်းမှာ ဒီလိုဒဏ်ရာပြဿနာတွေကြောင့် အသင်းရဲ့ ပစ်ပယ်မှုကို ခံရကာ ကျိုးကျိုးကန်းကန်းနဲ့ ဘဝပျက်ပြီး စောစောစီးစီး ဝါသနာကို စွန့်လွှတ်လိုက်ရတဲ့ ကစားသမားငယ်တွေ ကလဲ သု့အပြင် အများကြီး ရှိနေပါပြီ။ ကစားသမားတွေကို အသုံးချပြီး ဒဏ်ရာရရင် အမှိုက်လို စွန့်ပစ်တတ်တဲ့ အသင်းရဲ့ မတရား မျက်ကွယ်ပြုမှုတွေဟာ ရွံရှာဖွယ်ကောင်းလှပါတယ်။
ဒီလို ကစားသမားတွေကို ခေါင်းပုံဖြတ်တဲ့ စနစ်ဆိုးဟာ အမျိုးသမီးအသင်းတင် မဟုတ်ပါဘူး။ အမျိုးသားလက်ရွေးစင်ဟောင်း ရှိုင်းသူရ ကလည်း သူကိုယ်တိုင် ယူ-၁၉ (U-19) လက်ရွေးစင်စခန်း သွင်းတုန်းက သေလုမတတ် ပင်ပန်းတဲ့ Training တွေ ဆင်းပြီးပြန်လာချိန်မှာ ကျွေးတဲ့ နေ့လည်စာက "ကြက်ဥပြုတ်သုပ်၊ ကြက်ဥချက်၊ ကြက်ဥကြော်" ဖြစ်နေလို့ Facebook ပေါ် တင်ပြီး တိုက်ပွဲဝင်ခဲ့ရဖူးပါတယ်။
သူ ဖွင့်ချလိုက်တဲ့ အဆိုးဝါးဆုံး အမှန်တရားတစ်ခုကတော့ — "ဘောလုံးအသိုင်းအဝိုင်းတစ်ခုမှာ နောက်ဆုံး ဘယ်သူတွေ ချမ်းသာသွားလဲဆိုတော့ "စားဘဲ" တွေပါပဲ့။ တိုက်တွေ၊ ကားတွေ ကိုယ်စီနဲ့ ဖြစ်ကုန်ကြတယ်" ဆိုတဲ့အချက်ပါပဲ။ ကစားသမားတွေ အာဟာရပြတ်ပြီး ဆင်းရဲနေချိန်မှာ အောက်ခြေက အဂတိလိုက်စားသူတွေဟာ တိုက်တွေ၊ ကားတွေနဲ့ ခမ်းနားနေကြတာဟာ တကယ့်ကို သံဝေဂရစရာပါ။
အခုအချိန်မှာ ဒီပြသနာတွေရဲ့ ဖြစ်ရပ်မှန်ကို ဖုံးကွယ်ဖို့ ဘယ်လိုပဲ ကြိုးစားကြပါစေ... ကျွန်တော်တို့ ပရိသတ်တွေ လုံးဝ မေ့မပေးသင့်ပါဘူး။ နိုင်ငံ့ဝန်ထမ်းတွေဟာ ဂုဏ်သိက္ခာကိုထောက်လို့ အပြင်ကို ထုတ်ပြောလေ့မရှိကြပေမဲ့၊ အမျိုးသမီးငယ်လေးတစ်ယောက်အနေနဲ့ မိမိရဲ့ ဘောလုံးသမားဘဝနဲ့ အန္တရာယ်ကို သိရက်နဲ့ ထွက်ပြောခဲ့တာဟာ ပရိသတ် ပြည်သူတွေရဲ့ အသံကို အလွန်အမင်း လိုအပ်နေလို့ပဲ ဖြစ်ပါတယ်။
ဒီလိုမျိုး အားလုံးကိုယ်စား မိမိအန္တရာယ်ကို မထောက်ဘဲ ပြောဆိုရင်ဖွင့်ခဲ့တဲ့ ဒီဇင်ဘာနှင်းကို နွေးထွေးတဲ့ ဘဝလမ်း ဆင်မြန်းပေးနိုင်ဖို့ အခုဆိုရင် ပရိသတ်တွေမှာ စောင့်ရှောက်ပေးရမယ့် တာဝန် ရှိလာပါပြီ။ ကျွန်တော်တို့တွေက ဗီဒီယိုလေးကြည့်၊ စုပ်တသပ်သပ်လုပ်ပြီး ကျော်သွားမယ်ဆိုရင် ဒီဇင်ဘာနှင်းရဲ့ သတ္တိကို စော်ကားရာ ရောက်ပါလိမ့်မယ်။
နောက်ထပ် နောက်ထပ် ဘဝပျက်သွားမယ့် ကစားသမားတွေ မရှိစေဖို့၊ ကျွန်တော်တို့ မျှော်လင့်တဲ့ အဆင့်မှီ မြန်မာ့အမျိုးသမီးလိဂ်ကြီး ဖြစ်လာစေဖို့အတွက် ဒီလိုမျိုး အမှန်တရားအတွက် အရဲစွန့်ရဲတဲ့ "ဒီဇင်ဘာနှင်း" တွေ တစ်ယောက်မှသည် တစ်ရာအထိ ရှိလာအောင် ကျွန်တော်တို့ ပြည်သူတွေ၊ ဘောလုံးပရိသတ်တွေအားလုံးက အကာအကွယ်ပေးပြီး ပိုကောင်းတဲ့ အရွေ့တစ်ခုအတွက် စနစ်ဆိုးကြီးကို အတူတူ တွန်းလှန်ကြပါစို့ဗျာ။ ✊⚽
