18/04/2026
DARUSSA MAFI TSADA WAƊANDA NA ƊAUKA DAGA SHEKARU 18 ZUWA 27+
Na jima ina son na yi wannan rubutun, amma na kame ne domin in natsu in fito muku da ainihin gaskiyar da ake tsoron fada, Wannan tazarar shekaru (18 zuwa 27) sune asalin lokacin da matashi yake fuskantar zafin duniya da kansa ba tare da inuwar iyayensa ba.
A wadannan shekarun ne na koya cewa; mafi yawan mutanen da kuke dariya tare, ba sa kaunarka, kawai suna tare da kai ne saboda wata bukata ta lokaci guda. Na koya cewa soyayya bata da kima a idon mace idan aljihunka babu kudi, sannan babu wanda zai tausaya maka idan baka tashi ka nema wa kanka ba.
Wannan sune asalin darussan da na biya farashi mai tsada kafin in gane su:
1. Kowa Neman Nashi Yake:
Babu wanda zai ajiye matsalarsa ya warware taka matukar ba mahaifiyarka ko mahaifinka ba ne. Dole ka tashi ka nemi naka.
2. Abokan Banza babban Asara Ne:
Mutanen da kuke yawan yawo tare a shekara 18, kashi chasa'in a cikinsu ba zasu zama a kusa da kai ba idan ka kai 27 matukar ba su da kyakkyawar makoma.
3. Soyayya Tana Bukatar Kuɗi:
A daina rudar ka, Mafi yawan matan da kake son su a wannan lokacin ba zasu aure ka ba idan baka tsaya da kafafunka ba. Nemi kudi kafin ka nemi aure.
4. Sirrinka Shine Ƙarfinka:
Idan kana son samun nasara a asirce, ka daina gayawa mutane burinka har sai ka cimma shi. Idon mutane yana ruguza tsari.
5. Babu Mai Ceto Ka:
Idan ka zauna jiran Gwamnati ko Wani Oga ya baka jari, zaka tsufa a dakin iyayenka baka zama komai ba.
Bayan haka, na kara fahimtar cewa rayuwa bata tsayawa jiran ka gyara kuskurenka. Lokaci gudu yake yi ba tare da ya waiwaya ba. Idan baka koyi sana'a ko ka nemi ilimi ba a wannan lokacin, zaka ga kanka a matsayin wanda ya yi asarar samartakarsa. Don Allah ina rokon ka da ka tashi kayi lissafi mai kyau.
Allah ya bamu ikon tsare mutuncinmu.
ATP Hausa
