06/04/2026
Ang bahay na gusto ko ay may dingding na walang sumbat, hindi binibilang ang mali, hindi isinusumbat ang sakripisyo,hindi ginagawang sandata ang nakaraan tuwing may hindi pagkakaintindihan.
Gusto ko na may kisame ng kalma na hindi bumabagsak sa unang sigaw, na kayang saluhin ang pagod ng buong araw, na sapat ang katahimikan para muling huminga.
Nais ko ng bahay na may mga haligi na hindi kailangang patunayan, na hindi mo kailangang ipaliwanag kung bakit ka napagod, kung bakit ka natakot, kung bakit minsan gusto mo lang umupo at manahimik.
At may bubong na mas marunong makinig kaysa magalit. Na inuunawa muna ang ulan bago sisihin ang bagyo, na alam na hindi lahat ng ingay ay galit, kung hindi minsan nais lang ng pakikinig.
Ang bahay na gusto ko ay hindi perpekto. May lamat, may bitak, pero may espasyo para maghilom.
Isang bahay na kapag umuwi ka, hindi mo kailangang magpanggap, dahil sapat ka na.
