18/08/2026
🍝 المكرونة بالبشاميل بطريقة احترافية والوصفة اللي وعدت بيها حبيبة ❤️
حبيبة، أنا ما نسيتش سؤالك عن المكرونة بالبشاميل في البرنامج 😍 بس الوقت وقتها ما سمحليش أجاوبك بالتفصيل… فقلت أكتبلك الوصفة هنا بالمقادير المظبوطة وأسرار المطبخ اللي بتفرق جدًا في النتيجة. 👩🏻🍳❤️
✨ أول سر: نكهة الحليب
• 1 لتر حليب كامل الدسم
• 1 بصلة صغيرة
• 2 ورقة لورا
• 4 حبات قرنفل
• رشة جوزة الطيب
حطي البصلة مغروزة بالقرنفل مع اللورا في الحليب، وسخنيه على نار هادية من غير غليان حوالي 10 دقايق، و شيليهم.
💡 لأن الحليب هو أساس البشاميل، نكهيه من البداية ده بيخلي الطعم أعمق وأغني .
✨ البشاميل
• 80 جم زبدة
• 80 جم دقيق
• 1 لتر الحليب المنكه
• 8 جم ملح تقريبا
• ½ ملعقة صغيرة فلفل أبيض
• رشة جوزة الطيب
• 50 جم جبنة كريمي أو 50 مل كريمة طبخ (اختياري)
دوبي الزبدة، ثم ضيفي الدقيق وقلبيه بالمضرب حوالي دقيقتين من غير ما ياخد لون؛ إحنا عايزين نسوي الدقيق مش لون.
ضيفي الحليب الدافي بالتدريج مع التقليب المستمر لحد ما توصلي لقوام كريمي ناعم.
💡 البشاميل ما يكونش تقيل جدًا لأنه هيكمل تماسكه في الفرن. القوام الصح ينزل من المعلقة في شكل شريط مستمر.
✨ المكرونة
• 500 جم مكرونة قلم
اسلقيها في مياه مغلية ومملحة، أقل من التسوية الكاملة بحوالي دقيقتين، لأنها هتكمل في الفرن.
✨ الحشوة
• 500 جم لحم مفروم
• 1 بصلة متوسطة مفرومة
• 1 ملعقة كبيرة زيت
• ملح وفلفل أسود
• رشة قرفة خفيفة جدا (اختياري)
شوحي البصل، أضيفي اللحمة وشوحيها لحد ما تتغير لونها وتتخلص من السوائل، ثم تبليها.
✨ التجميع
ادهني الصينية بطبقة بشاميل، واخلطي جزء من البشاميل مع المكرونة عشان كل حبة تتغلف بالصوص.
نصف المكرونة → اللحمة → باقي المكرونة → باقي البشاميل.
وممكن تضيفي على الوش 50–70 جم موتزاريلا أو خليط موتزاريلا ورومي.
🔥 الفرن
فرن سخنيه قبل ما تشتغلي على 200°C لمدة 25–30 دقيقة لحد ما تتماسك وتاخد لون ذهبي. ولو محتاجة لون أقوى، شغلي الشواية آخر 2–3 دقائق فقط.
❤️ وأهم سر بعد الفرن؟
ما تقطعيش المكرونة أول لما تطلعيها من الفرن ! سيبيها ترتاح 15–20 دقيقة عشان البشاميل يثبت وتطلعي قطعة متماسكة وجميلة.
وحبيبة ❤️ أهو وعدي ليكي أتوفى… ومستنية أعرف منك لما تعمليها: الطعم طلع إزاي؟ 😍👩🏻🍳
