Passant Azkoul handmade

03/05/2026

كل واحدة فينا ليها طريقتها الخاصة وهي ماسكة إبرة الكروشية 🤏🧶
في اللي تمسكها زي القلم ✍️
وفي اللي تفضل مسكتها زي السكينة 🍴😂
وفي الآخر… المهم إن الغرز تطلع مظبوطة والقلب مبسوط 💜

قوليلي إنتِ بتمسكي إبرة الكروشية إزاي؟ 👀
ويا ترى غيرتي طريقتك مع الوقت ولا لسه زي أول غرزة؟ ✨
أنا عن نفسي طول عمري بمسك الإبرة زي السكينة و معرفتش امسكها بطريقة تانية

#كروشية
💜🧶

27/04/2026

اعمليها بنفسك مع بسنت 🌻 الحلقة التانية - الجزء التاني

الجزء التاني من ورشة وردة دوار الشمس 💛
هنكمل سوا التفاصيل اللي بتخلي الوردة تبقى حقيقية ومبهجة ✨

لو عملتي الجزء الأول، جهزي خيوطك وتعالي نكمل سوا خطوة بخطوة 👌
ولو لسه، تقدري ترجعي له بسهولة وتلحقينا 💫

مستنية أشوف شغلكم الحلو 😍
متنسيش تبعتيلي النتيجة أو تعملي منشن علشان أنزلها عندي ❤️
عايزه اقولكم الجزء الأصفر ده اخد مني اكتر من اسبوعين حرفيا علشان اعمله ، لأني ببساطة مش لاقيه أي وقت انا كنت بشتغل فيه بدل ما أنام و ارجع اندم طبعا 🫣🤣 يالا الحمد لله
ادعولي ربنا يبارك في ولادي و يهديهم .. مستنية تطبيقاتكم

#كروشية

17/04/2026

في كل مرة بحس إني تايهة أو مضغوطة… بلاقي نفسي راجعة لنفس المكان 💛

الكروشية مش مجرد خيط وإبرة… الكروشية كان طوق نجاة
أول مرة أنقذني هو و الرسم وقت صدمة وفاة بابا… وقتها كنت حرفيًا بحاول أتنفس
وكانوا هما الحاجة الوحيدة اللي بترتب فوضى جوايا

ودلوقتي… بيرجعوا ينقذوني تاني
وسط ضغط نفسي كبير جدًا مع الولاد، ومسؤوليات مابتخلصش
بلاقي في كل غرزة هدوء… وفي كل قطعة بعملها جزء مني بيرتاح
مش هتصدقوا لو قولتلكوا اني باخد من وقت نومي علشان اشتغل سطرين ولا اكتب بوست زي ده لأن الوقت صعب جدا مع توينز رضع
يمكن الكروشية بالنسبة لناس كتير هواية
لكن بالنسبة لي… هو أمان، علاج، وملجأ بعد ربنا برجعله كل ما الدنيا تضيق

لو عندك حاجة شبه كده… اتمسكي بيها جدا
و انصح اي حد يكون عنده هواية يعرف يفصل بيها شوية عن ضغوط الحياة

13/04/2026

12/04/2026

🌻✨ اعمليها بنفسك مع بسنت | 2

النهارده هنعمل مع بعض وردة دوار الشمس بالكروشية 💛
تنفع:
🌻 تتحط في بوكية ورد أو فازة وممكن كمان تبقى ورد خاص بالعروسة يعيش و عمره ما يدبل و يفضل العمر كله يفكرك بلحظات جميلة
🌻 ميدالية
🌻 بروش
🌻 تزيين شنطة
🌻 أو حتى هدية كيوت جدًا تقدروا تهادوا بيه الناس اللي بتحبوهم
هتاخد شوية وقت في الأول علشان أكون صريحة بس أول ما تتعودي على طريقتها إن شاء الله هتبقى سهلة و هتحبي تكرريها كتير

قوليلي بقى
تحبي تستخدميها في إيه؟ 💭
وهتعمليها بأي ألوان؟
و دي
🌻الأدوات اللي هنستخدمها 👇
خيوط قطن حسب الالوان اللي هتعمليها بني و أصفر و أخضر لو نفس الالوان بتاعتي و في ناس اشتغلتها درجات بينك أو درجات ازرق مع ابيض كانت حلوة زي ما تحبوا
🌻إبرة مقاس 3
🌻سلك مجلفن من الموان ( محلات الحدايد و البويات )
🌻حشو فيبر ( بتاع المخدات )
🌻عود ساق ورد ( من بتوع الورد الصناعي) و ممكن استبداله بعصيان الشيش
🌻شمع سيليكون
🌻ماركر
🌻مقص

10/04/2026

🧶حكاوي الخيوط | 3

فاكرة أول إبرة كروشية استخدمتيها كانت إيه؟ 😄
أنا بدأت بـ (إبرة ستانلس فضي رقم زيرو )… وكانت بالنسبالي وقتها أحلى حاجة في الدنيا 💛 مش لأنها فعلا أحسن حاجة ولكن علشان مكونتش أعرف انواع غيرها كان في من نفس النوع ارقام تانية بمقاس اصغر
عايزه اقولكم فضلت فترة كبيرة جدا بشتغل بيها عملت بيها بلوفرات و كوفيات كتيييير لحد ما اكتشفت ان في حاجات تانية فالدنيا 🤣🤣
مقولكوش كانت طبعا بتتعب ايدي بس كانت والله متينة بعد فترة سمعت ان ناس بيغلفوها بالشمع السليكون كمقبض عملت كده هي ريحتني بس الشمع مكانش متساوي فكان بيوجعلي ايدي برضو 😅
بعد شوية تجربة وغلطات طبعًا 😅
غيرت وبقيت أستخدم ( الابر الاستانلس الكبيرة )… وحسيت الفرق في الشغل جدًا 👌 ايييه ده الشغل بيكبر اسرع بكتير طبعا و فضلت استخدم النوع ده تقريبا اكتر فترة لاستخدامي ابر ، ابرتي المفضلة كانت رقم 3.5 فضلت استخدمها لحد ما اتكسرت لما نزلت اجيب غيرها لقيت ان في بإيد سيليكون جبتها لقيتها مريحة فالمسكة بس خامة الابرة نفسها مش حلوة رديئة
فرجعت جبت الاستانلس العادية
لحد ما سمعت عن ابر (تيوليب) من كام سنة و كانت وقتها الحقيقة غالية اوي بالنسبالي و طبعا هي غليت دلوقتي اكتر بس قولت نجرب و جبتها فعلا و من يومها و انا مبستخدمش غيرها فعلا ريحتني جدا الحمد لله
مريحة في الإيد فعلا و ناعمة و سلسة اوي 👏✨
و بعدين كنت عايزه مقاس مختلف و سمعت عن براند شوما انه اقرب حاجة لتيوليب فقولت اجرب لأن فرق السعر كبيير و جبتها و طلعت حلوة فعلا فبقيت بشتغل بيهم الاتنين و بس
و دي كانت حكايتي مع إبر الكروشية
وانتوا بقى؟ 👀
بدأتوا بإيه؟ وبتستخدموا إيه دلوقتي؟

مستنية حكاويكم يا مبدعات 🧡🧶






#كروشية

08/04/2026

جهزوا خيوط قطن الألوان اللي تحبوها و نشتغل خطوة خطوة مع بعض بإذن الله
ممكن تعملوها درجات بينك
و في ناس عملوها درجات أزرق كانت حلوة اوي برضو
ممكن لو معندكيش السلك اللي بيتعمل بيه الساق تشتغلي على عصيان الشيش عادي
الخطوات مش هتنزل مرة واحده في بوست واحد
هنزل خطوة و استنى تنفذوها يومين مثلا و انزل خطوة تانية و لما نخلص خااالص ان شاء الله اجمعها كلها مع بعض في بوست واحد ورشة كاملة علشان لو حد حب يرجعلها تاني يلاقيها

07/04/2026

لو نفسك تبدأي كروشية أو تعملي حاجة بسيطة بإيدك…
السلسلة دي ليكي 💜

كل مرة هنعمل مع بعض حاجة سهلة وخطواتها بسيطة
تقدري تنفذيها حتى لو لسه مبتدئة 👌
هتبقى عبارة عن حلقات كل حلقة ورشة عمل صغيرة لفكرة تعملي منها منتج في نهاية الورشة
حلقة النهاردة: محفظة للفكة💰🪙👛 أو تحطي فيها ميني برفيوم و ليب بالم✨💄
الحقيقة استخداماتها كتير اوي تنفع هدية و توزيعات فالعيد🍬 او سبوع البيبي
ميني باوتش كروشية
تفاصيل صغيرة = أناقة كبيرة
لو بتحبي الحاجات الكيوت و الهاند ميد فالميني باوتش دي هتبقى صاحبتك
و طبعا متاح طلبها بأي عدد و أي لون

يلا بينا نبدأ 🧵
وقولولي في الكومنتات عايزين تعملوا إيه المرة الجاية؟





#كروشية

07/04/2026

👛💰

07/04/2026

بنعتذر عن الخطأ التقني و هنحاول نصلحه بسرعة ان شاء الله 🌷