22/08/2026
تعالي هقولك علي حاجات هتعمليها تسهل عليكي شغل البيت وهتخلي بيتك دايمًا نضيف 👌👌✨️✨️
👇👇👇
-- قومى سريعا يوميا بتلميع الموبيليا على السريع وامسحى السيراميك المكشوف علطول أول بأول بممسحه
-- السجاد متسيبهوش فترة من غير ما تكونى منظفاه بفرشة وبالمكنسة صدقونى الشغل ده مش بياخد اكتر من ساعة والبيت بيكون فلة
-- لو عندك بيبى اقفلى ابواب الغرف وحطيه فى مكان وحطيله لعبه يلعب بيها والسجادة اللى بيلعب عليها حطى عليها ملاية قديمة او اى حاجة علشان متتبهدلش
-- لو عندك بنوتات صغيرين علميهم يرتبوا سرايرهم ويلموا لعبهم
-- حاولي تعملي اكتر من حاجة فى نفس الوقت يعنى
مثلا لو واقفه جنب الأكل لحد ما يغلى اغسلي كام كوباية على طبق كدة يعنى
-- وانتي بتعملي الاكل وعلى مايستوى تكوني رتبتي البيت وظبطيه
-- حاولي أول بأول تشيلي الكراكيب اللى فى البيت اللى ملهاش لازمة يعنى لو فاضيه شوية افرزى الجزم فى يوم ويوم تانى افرزى الأدوية ويوم الاوراق يعنى علشان ما يكونش في كراكيب كتير فى الشقة ومتتعبيش فى ترتيبها
-- الدولاب لازم اول باول تخرجى كل الملابس اللى انتى مبتلبسهاش واديها لحد محتاج الطريقة دى هتخفف الكركبة فى الدولاب
-- التسريحة مترصيش عليها كل مكياجاتك وبرفاناتك حطى بس اللى بتستخدميه يوميا زى المشط والمرطب والبرفان الخاص بيكى علشان يبقى سهل عليكى تلميعها وترتبيها
-- الغسيل لو عندك غسالة اتوماتيك اغسلى علي طول ومتجمعيش غسيل عليكى و الشرابات والملابس الداخليه اغسليها اول باول
-- بالنسبة بقى للبوتجاز غطى الطاسة وأنتى بتقلى علشان الزيت ميبهدلش الدنيا وأول بأول لو وقع عليه اكل نظفيه وغطى كمان الجزء المكشوف من البوتجاز بفوطة مبلله ومعصورة وأنتى بتقلى علشان البوتجاز ما يتبهدلش
-- أى طبق بنحطه فى التلاجة يتمسح من تحت علشان لو فيه أى أكل ميوسخش التلاجة
-- الحمام بعد ما أى حد بيستحمى علطول نشفيه
-- اعملي كل يوم حاجه مع التنظيف اليومي يوم تلمعى الموبيليا وترتبى الأدراج والدولاب
و يوم تانى أغسلى الشبابيك يوم تالت نفضى البراقع وأخر ويوم شيلى السجادة نفضيها وامسحى الأرض
-- وانتى شغالة فى البيت اسمعي قرآن هيملي بيتك بركه وهيريح نفسيتك
واخيرا متنسوش تصلوا علي سيدنا محمد ❤️
