08/03/2024
حبايبي ازيكم وحشتوني🙏
للاسف تعذر اني اعمل فيديو تجهيزات رمضان لضيق الوقت
بس حقولكم تعملوا ايه يسهل عليكم وقفة المطبخ ,ويضمنلكم تعملوا عزايمكم وفطار رمضان بمنتهي السهولة وبدون تضييع وقت العبادات
اول حاجة وأساس سفرة فطارنا كمصريين اول ايام رمضان هي المحاشي بانواعها طبعا
حتجيبي مستلزمات المحشي (أنا بعمل محشي الضلمة اللي هو فلفل وكوسة وبتنجان) والبطاطس وكمان محشي ورق العنب والممبار والكرنب كله مرة واحدة وبالكمية اللي تكفيني الشهر كله:
نفس خلطة المحشي للكل مع اختلاف:
-الممبار حنزودله قرن فلفل حامي ورومي
-ورق العنب حنحط دبس رمان ونزود شوية في النعناع الناشف وممكن نضيف لحمة مفرومة للخلطة لو حبة
طبعا الكميات حسب اللي حتجهزيه أنا بعمل كمية كبيرة قوي وبقسمها في علب في الفريزر بتكفي معايا الشهر كله
-المحشي الضلمة والبطاطس المحشية يتسوي ويتفرز مستوي
-ورق العنب والكرنب يتلف ويتفرز ني
-الممبار يتفرز بعد ما يتحشي ويتسلق
طبعا الموضوع حيبقي متعب شوية بس انت ممكن تحضري الخلطة وتشليها في التلاجة وبدون ما تزودي الرز وتزوديه كل يوم مع الخلطة بقة وانت بتحشي بيه نوع المحشي يعني علي يومين بالكتير حتكوني خلصتيه وارتحتي الشهر كله 😀
-السمبوسة والسبرنج رولز(اتفرجوا علي الفيديو عملتها معاكم قبل كدة) تتحشي الحشوة اللي تعجبكم وتتفرز
-الكبيبة نفس الكلام تتفرز وتتطلع علي التحمير)اتفرجوا علي الفيديو الكبيبة خطواتها وتركاتها ما فيش اسهل من كدة
كدة مقبلات رمضان جاهزة معانا.
الخضار لو بتحبيه فرش يتقطع وينزل في مية سخنة ويتقسم في اكياس ويتفرز مش حيجراله حاجة ما تقلقيش بيقعد لحد سنة.
-بالنسبة بقة لصواني بشاميل .
حنسوي اللحمة المفرومة ونشيلها في علب في الفريزر حتسهل علينا كتير(لو حتعملي اي صواني او رقاق او جلاش.
-الصواني اللي ينفع تتعمل و تتفرز وتطلع يادوب علي التسوية في الفرن لو عندك مكان:
المكرونة والكوسة والمسقعة بالبشاميل.
-اي شوربة فراخ ،لحمة او بط او حمام عندك فضيها في مكعبات تلج وتتفرز وخرجيها علي الاستخدام حتسعف معاكي في الوقت جامد وبتحلي اكلاتك.
-ملك السحور بقة الفول هاتي كيلو فول ودمسيه وقسميه وفرزيه ونفس الكلام لو بتحبي الطعمية في رمضان(اتفرجوا علي فيديو الفول المدمس وعجينة الطعمية وازاي تطلعي فول وطعمية احلي من الجاهز).
كل سنة وانتم طيبين ورمضان كريم علينا جميعا باذن الله❤️❤️
واللي حابب يسألني عن اي حاجة يبعتلي ويشرفني التواصل معاكم❤️
