14/12/2025
البضاعة غالية.. بس عرق الناس رخيص؟!)
العنوان: بتدفع للبضاعة "من سكات".. وتيجي على حق الصنايعي وتفاصل؟!
يا جماعة في حاجة غريبة جداً بتحصل ومحتاجة وقفة وتوعية..
أنا كصنايعي لما بدخل بيت عميل، بعتبره بيتي. بدخل اشتغل "بفن واحترافية"، بحافظ على نضافة المكان، وبراعي حرمة البيت، وبطلع الشغل "مسطرة" بما يرضي الله. دي أصول تربينا عليها في صنعتنا.
الموجع في الموضوع مش التعب، الموجع هو "ازدواجية المعايير"!
العميل ينزل يشتري الخامات والبضاعة، يدفع فيها أرقام فلكية وهو ساكت ومبسوط، ولا يقدر يفاصل مع التاجر في جنيه.
لكن أول ما ييجي وقت حساب "المصنعية" وحق إيدينا وشقانا.. فجأة الميزانية بتخرم، والجدال بيبتدي، ومحاولة "أكل الحقوق" بتظهر!
يا أستاذي الفاضل..
الخامة اللي أنت شاريها دي "جماد"، لكن أنا "بشر" وليا طاقة وليا التزامات.
أنا بحاسبك على "الشطف" و"الدوران" والتفاصيل اللي بتخلي بيتك قصر، مش بطلب صدقة.
أنا حافظتلك على بيتك وسلمتهولك زي ما استلمته وأنضف، وده لوحده تمنه غالي.
رسالة لكل الناس:
زي ما بتحترم سعر البضاعة اللي في الفاتورة، احترم عرق الصنايعي اللي نطق البضاعة دي وخلاها ليها قيمة.
البضاعة مبتتعبش، بس إحنا بنتعب.
ويا بخت من بات مظلوم ولا باتش ظالم.. وأنا حقي عند ربي كبير ومش مسامح فيه.
