10/10/2025
النصائح قبل عمل اى مطبخ
بصي هقولك الخلاصة بعد لف كتير علي المطابخ الخشب والالوميتال
وأنواع الخشب الجديده وأنواع الالوميتال وأنواع الاكسسوارات مفصلات و ادراج وماجيك كورنر ، وكمان انواع الرخام ،،
ورقه وقلم واكتبي ورايا ال10 حاجات دي :
رقم 1 : لو البادجيت عندك قليلة إعملي مطبخ الوميتال، وخللي بالك بقولك لو البادجيت عندك قليله ، لأن هي دي الميزة الوحيدة في المطابخ الالوميتال ، لكن غير كده هو مش حلو خالص.
رقم 2 : لو البادجيت عندك كويسه إعملي مطبخ خشب من الحاجات الجديدة إللي طالعه اليومين دول ، بصراحة الخشب احلي وأشيك ويستاهل الفلوس إللي بتدفع فيه ، لكن ذي ما قولتلك لو البادجيت قليله عندك أمرك إلي الله اعملي الوميتال ومتنكديش علي نفسك ، بس لو عرفتي تحوشي شوية إعملي خشب هيعجبك و هتتبسطي بيه بجد وخصوصا إن إحنا بنقضي معظم وقتنا في المطبخ ، وعايزين حاجة تفتح نفسنا وإحنا واقفين في المطبخ.
رقم 3 : اوعي علشان توفري تعملي مثلا علب المطبخ الوميتال وتركبي عليها أبواب خشب جديده ذي البولي لاك والجلوس ماكس لأن الخشب الجديد ده تقيل والعلب الالوميتال خفيفه ، وبعد شوية هتلاقي الأبواب بتقع لأنها تقيله علي العلب الالوميتال ، يعني لو عايزة تعملي الانواع الجديده بتاعة الخشب يبقي لازم العلب تكون خشب علشان تقدر تشيل أبواب المطبخ ، ونوع خشب العلب يبقي كونتر كويس وبعد لف وسؤال أحسن حاجه كونتر جوود وود ويكون معزول كويس علشان ميتأثرش من المياه والحرارة ويكون مش بيربي حشرات.
رقم 4 : مفيش داعي تكلفي نفسك وتعملي إكسسوارات ذياده في المطبخ ( ماجيك كورنر وحاجات تانيه شبهه) إلا لو البادجيت كويس يبقي مفيش مشكله اعمليها ، لكن لو قليل مفيش داعي منها.
رقم 5 : اوعي توفري في بند المفصلات بالذات لازم تكون مفصلة محترمة وتتحمل شغلنا بتاع المطبخ واسئلي علي مفصلة ( بلوم ) هي اعلي نوع مفصلات ، صحيح هتتعبي لحد متلقيها لأنها ناقصة شوية في السوق بس تستاهل بصرآحه. ( معلش اتعبي شوية وهتلاقيها😀)
رقم 6 : موضوع الأدراج مهم في المطبخ علشان بيخليكي تستخدمي مطبخك بسهولة علشان الدرج بيطلعلك بره بالحاجات إللي جواه علي عكس العلبه إللي بتكون بباب لازم تدخلي جوه العلبه علشان تطلعي الحاجه من جوه العلبه ( أكيد فهمتي قصدي)
وخللي بالك بعد لف طويل ادراج المطبخ بتكون مخصوصة للمطبخ مش لدواليب الهدوم ( ودي نصيحه مهمة) عرفتها بعد لف كتير ، إن المفروض الدرج يكون معدن مش خشب ، علشان إحنا في المطبخ بنحمل حاجات كتير وتقيله ( حلل وصواني وطواجن وغيره) وبردو خليكي في ادراج ( بلوم) صحيح غاليه شوية وقليله في السوق بس تستاهل 👌.
رقم 7 : لو المطبخ عندك صغير اعمليه أمريكان ( مفتوح ) لأننا بنقضي وقت كبير في المطبخ ، فمش معقول نزنق نفسنا طول الوقت في مطبخ ضيق وخايفين نعمله أمريكان علشان يمكن ضيف يجلنا مره ولا مرتين في السنه وخايفين يشوف كراكيب المطبخ لما يجلنا زيارة ، ياستي ابقي وضبي المطبخ قبل لما الضيوف يجوا ، 😂
رقم 8 : رخام المطبخ يأما تعملية جرانيت غامق يأما تعملية كوارتز فاتح ، لكن إوعى تعملي جرانيت فاتح لإنه هيبقع وهينكد عليكي كل لما تشوفي البقع وهيبوظلك شكل المطبخ 😭
رقم 9: اهتمي بالاضاءات بتاعت المطبخ خصوصا الإضاءة إللي بتركب تحت العلب إللي فوق علشان تنورلك الرخامه ، تحفه بجد.
رقم 10 : مش مهم البيع بالمتر المربع ولا بالمتر الطولي ولا بالوحده ، وعايزة اقولك كمان مش مهم سعر المتر أصلا ،،
لأن في ناس بتقلل سعر المتر لكن بتذودلك عدد أمتار المطبخ ، علشان كده المهم المطبخ عندك هيطلع في الاخر بكام فلوس ، علشان كده إعملي رسمة المطبخ وخدي سعر من آكتر من حد ، وعلشان أنا معملتش كده للأسف دفعت معاينات كتير لاكتر من شركة ، لحد مستقريت الحمد لله علي المطبخ بتاعي وأخيرا ربنا كرمني وعملته ،،
