بيت الخالة نوسة

25/06/2026

اللهم لك الحمد والشكر يارب
عنوانا ارض مفتاح بجوار مطعم الخاله نوسه
علشان نكون قد ثقتكم فينا رسميا

24/06/2026

بجد "اللهم لا تحرمنا زياره بيتك ابدا"

22/06/2026

انا موجوعه اوى ومش عارفه اتخطى الوجع بسهوله ابدا
زمان كنت بقول على نفسي قوية
وأعدي من وجع كبيير وأقوم تاني
لكن من بعد ما ناس غالية راحت من حياتى
ومن بعد ما الموت خطف وجوه كنا فاكرين إنها هتفضل معانا العمر كله
حاجة جوايا اتكسرت
بقيت أي كلمة توجعني
وأي موقف يزعلني
وأي ذكرى تهزني من جوا
يمكن علشان الحزن لما بيكتر بيغير الإنسان
يمكن علشان الطفل اللي جوايا بتتوجع مع كل خسارة ومحدش بياخد باله
ويمكن علشان فيه حاجات حصلت زمان عمرها ما خرجت من قلبى
وجع قديم وذكريات صعبة وكلام عمره ما اتنسي
كنت فاكره إن الزمن هيخلينى أقوى
بس ساعات الزمن بيخلينا أرق وأضعف من جوه
بنبقى بنضحك ونتكلم عادي
لكن قلوبنا مليانة حنين لناس مش هترجع
ومليانة وجع على أيام كانت أحن من دلوقتي
بصراحة أنا مش زعلانة من موقف واحد
أنا تعبانة من حاجات كتير حصلت فى حياتى تراكمات سنين
من فراق ناس كانوا عندى غاليين اوى وكنت بحبها
ومن صدمات ما كانتش في الحسبان
ومن إحساس إن الدنيا كل شوية بتاخد مننا حد غالي
لحد ما بقينا بنخاف نفرح أوي
وبنخاف نتعلق أوي
وبنخاف نخسر تاني
ربنا يرحم كل حبيب سبقنا ربنا يرحم ابويا اللى كان أجمل حاجه شوفتها ومش هتتكرر ابدا
وربنا يجبر القلوب اللي تعبت من كتر الفقد
ويعوضنا عن كل وجع ساكن جوانا ومش عارفين نحكيه. 🖤

21/06/2026

أصعب صدمة في الدنيا لما حد من قرايبنا يمشي بدري... لما نبقى شايفينه وسطنا من يومين أو حتى من ساعات ونفكر إنه لسه قدامه عمر طويل وأحلام وحكايات كتير ولسه هنفرح بيه... وفجأة ييجي الخبر اللي يوقع القلب قبل ما يوقع الدمع من العين.
موت الشباب وجع مختلف... وجع ما بيتوصفش.
لأننا ما بنبقاش عاملين حساب الفراق.
بنكون فاكرين إن الدور لسه بعيد وإن العمر لسه قدامه سنين طويلة.
وفجأة البيت يفضى من صاحبه.
الضحكة اللي كانت مالية المكان تختفي.
الكرسى اللي كان بيقعد عليه يبقى فاضي.
اسمه يتردد في كل ركن.
وصورته تبقى موجودة في كل حتة كأنها بتفكرنا إنه كان هنا من شوية.
أصحابه يقعدوا يفتكروا مواقفه وضحكاته وكلامه...
وأهله يقعدوا يدوروا عليه بعنيهم في كل مكان.
كل واحد فيهم عنده ذكرى... عنده حكاية... عنده موقف عمره ما هينساه.
لكن أصعب ناس في الوجع هم الأب والأم.
الأم اللي كانت مستنية تفرح بابنها وتطمن عليه وتشوف أيامه الجاية.
والأب اللي كان شايف ابنه سنده وعزه وضهره.
محدش يعرف النار اللي بتبقى جوا قلب أب وأم فقدوا ابنهم إلا اللي جربها.
والحقيقة إن الفراق دايماً بيعلمنا الدرس بعد ما يفوت الوقت...
نقعد نقول يا ريتنا قعدنا معاه شويه أكتر.

يا ريتنا ضحكنا معاه أكتر.
يا ريتنا قولناله قد إيه بنحبه.
يا ريت ما زعلناهوش في يوم.
يا ريت ما قصرناش معاه.
وزي ما الأب لما بيموت ولاده بيشيلوا حمل غيابه ويفضلوا يقولوا يا ريتنا ماكنا زعلناه أبدا
برضه الشاب لما يمشي بدري بيسيب حمل كبير في قلوب أهله وأصحابه وكل اللي حبوه.
بيسيب فراغ عمره ما يتملي... ووجع عمره ما يختفي بالكامل.
الله يرحم كل شاب فارق الدنيا بدري ويجعل شبابه شفيعاً له ويصبر قلب أمه وأبوه وأهله.
ويارب ما تدوقش حد مرارة الصدمة دي ولا وجعة الفراق اللي بتيجي فجأة من غير أي استعداد.
إنا لله وإنا إليه راجعون. اللهم اغفر له وارحمه وأسكنه فسيح جناتك واجعل ذكراه الطيبة صدقة جارية في قلوب كل اللي عرفوه.

19/06/2026

جمعه مباركه قومى بسرعه بخرى بيتك
وخرجى الطاقه السلبيه وافتحي شبابيك بيتك❤

19/06/2026

يارب #عمره من حيث لا نحتسب انا كل من قال امين ببركه الصلاه على حضره النبى

18/06/2026

متابعه بتسألني ان فيه فرصه للجواز لها وهى خايفه من كلام الناس علشان مش قادره اعمل فيديو لكن اوعدها انى هعمل فيديو لان الكلام ده مهم جدا جدا وناس كتير عندها نفس المشكله دى وحبيت اعمل بوست اقول فيه رااى والحقيقه ان فى كل الحالات مافيش حد بيعجبه حاجه زى مثلا..
الست المطلقة لو اتجوزت يقولوا نسيت عيالها
ولو ما اتجوزتش يقولوا أكيد فيها عيب
ولو ضحكت يقولوا مش فارق معاها
ولو زعلت يقولوا عايشة دور الضحية
ولو اشتغلت يقولوا سايبة بيتها
ولو قعدت في بيتها يقولوا عالة على غيرها
يعني في كل الأحوال الناس هتتكلم
عشان كده يا ست الكل عيشي حياتك بالطريقة اللي تريحك انتي
اتجوزي لو حابة تتجوزي
وكملي لوحدك لو ده اللي مريحك
ربي عيالك وافرحي بنفسك واعملي اللي يرضي ربنا ويريح قلبك
الناس عمرها ما هتسكت
بس انتي اللي هتعيشي عمرك كله مع قراراتك
فبلاش تضيعي سنين من عمرك خوف من كلام ناس هتتكلم النهارده وهتنسى بكرة
الطلاق مش نهاية حياة الست
والجواز التاني مش عيب
والسعادة مش حرام
ومن حق أي ست تبدأ من جديد ألف مرة لو حبت
هو ليه المجتمع ياجماعه بيسامح الراجل لما يتجوز بعد الطلاق بسهولة وبيحاكم الست لو فكرت تعمل نفس الحاجة؟ 🤔💔 ليه الناس بتحرم حلال ربنا شرعه ماحدش شاف مشوار الست دى وايه اللى عاشت فيه علشان ننصب نفسنا حكام على بعض

17/06/2026

مش اى حاجه تبقى عليا بجى🤔🤔

17/06/2026

هجعد اربى عيالى🙄🙄

15/06/2026