ისტორია
სიზმრების დამჭერი ( DreamCatcher) ადგილობრივი ამერიკელების, ძველი ინდიელების თილისმაა. მას სხვადასხვა ტომში განსხვავებული ლეგენდა უდევს საფუძვლად, თუმცა თითოეულ ლეგენდაში სიზმრების დამჭერის არსებობა ერთ მიზანს ემსახურება, ესაა მძინარე ადამიანის დაცვა ბოროტი სულებისგან და მისი მშვიდი ძილის უზრუნველყოფა.
კლასიკური სიზმრების დამჭერი შედგება წრისაგან, ობობას ქსელის იმიტაციისა და მასზე ჩამოკიდებული ბუმბულებისგან.
ინდიელთა რწმენით, ობობას ქსელი ცუდ სიზმრებს იჭერდა, რომელსაც დილით, მზის პირველი სხივი ფანტავდა. ხოლო კარგი სიზმრები ბუმბულების მეშვეობით დაბლა დაეშვებოდა და მძინარე ადამიანს ეფინებოდა.
დღეს სიზმრების დამჭერსა და ლეგენდებს მის შესახებ ბევრი ადამიანი ცრურწმენად მიიჩნევს, თუმცა, ამის მიუხედავად, სიზმრების დამჭერი არ კარგავს პოპულარობას და მას ვხვდებით არა მხოლოდ ტრადიციული დანიშნულებით, არამედ სხვადასხვა სამკაულებისა და აქსესუარების სახითაც.