18/03/2014
საქართველო ლაიფციგის წიგნის საერთაშორისო ბაზრობაზე
საქართველოს კულტურისა და ძეგლთა დაცვის სამინისტროს მხარდაჭერითა და “საქართველოს წიგნის გამომცემელთა და გამავრცელებელთა ასოციაციის“ ორგანიზებით, საქართველო ლაიფციგის წიგნის საერთაშორისო ბაზრობაზე წარდგა. კულტურის სამინისტროს დელეგაციას ლაიფციგში ქართული წიგნისა და ლიტერატურის პროგრამის მენეჯერი მედეა მეტრეველი ხელმძღვანელობდა.
საქართველოს სტენდმა დიდი ინტერესი გამოიწვია, როგორც გამომცემლებსა და ლიტერატურის აგენტებში, ასევე წიგნის ბაზრობის სტუმრებში. ბაზრობის ფარგლებში გაიმართა რამდენიმე ქართველი ავტორის ნაწარმოებების საჯარო კითხვა, პროექტებისა და წიგნების პრეზენტაციები.
ვიზიტის ფარგლებში ქართულმა დელეგაციამ შეხვედრები გამართა ფრანკფურტის წიგნის ბაზრობის ვიცე-პრეზიდენტთან ტობიას ვოსთან და სტუმარი ქვეყნის სტატუსის პროგრამის ხელმძღვანელთან სიმონე ბიულერთან. საუბარი შეეხო 2018 წელს, ფრანკფურტის წიგნის ბაზრობაზე საქართველოს სტუმარი ქვეყნის სტატუსით მონაწილეობას. ასევე გაიმართა შეხვედრები გერმანელ გამომცემლებთან, მწერლებთან, სხვადასხვა ქვეყნის ლიტერატურულ აგენტებთან.
15-16 მარტს გაიმართა ქართველი ავტორების ანა კორძაია-სამადაშვილის წიგნის „მე, მარგარიტა“ და ბესო ხვედელიძის „თაგვის გემო“ საჯარო კითხვა. ამავე წიგნების კითხვა შედგა ლაიფციგის ერთ-ერთ ყველაზე ცნობილ ლიტერატურულ სალონში „ტელეგრაფი“. წიგნები გერმანულ ენაზე საქართველოს კულტურისა და ძეგლთა დაცვის სამინისტროს ფინანსური მხარდაჭერით ითარგმნა და გამოიცა 2013 წელს.
ლაიფციგის წიგნის ბაზრობის ფარგლებშივე გაიმართა ოთარ ყარალაშვილის უნიკალური საგანმანათლებლო პროგრამის „ვირგამი“ (ვირტუალური გამომცემლები) პრეზენტაცია, რომელიც ახალგაზრდა ილუსტრატორთათვის არის განკუთვნილი.
ბაზრობაზე ქართველი მწერლებისა და გამომცემლების მიმართ ინტერესი ძალიან დიდი იყო, რაზეც პრეზენტაციებზე აუდიტორიის სიმრავლე და დამსწრე საზოგადოებსთან საინტერესო დისკუსიები მიუთითებდა.
ლაიფციგის წიგნის ბაზრობაზე შედგა საქართველოს კულტურისა და ძეგლთა დაცვის სამინისტროსა და მიხეილ თუმანიშვილის ფონდის მიერ ჩატარებული დრამატურგთა საერთაშოსო კონკურსის „საუბარი საზღვრების გარეშე“ პრეზენტაცია და კონკურსში გამარჯვებული პიესის საჯარო კითხვა. ნაწყვეტები დათა თავაძის პიესიდან „დედა ომი“ და ბასა ჯანიკაშვილის პიესიდან „გაბრაზებული ჩიტი“ ქალაქ ნიურნბერგის თეატრალური დასის წევრებმა წაიკითხეს.
