18/08/2026
👍🏻👍🏻👍🏻
【文具佬最新近況Update｜一次過同大家講🫶🏻】
好耐冇同大家千字文Update近況，今日7嫂一次過同大家分享
1）先講重點：
今年經營環境比預期更具挑戰，市道繼續差，加上行業競爭加劇，但我哋目標冇變——
穩住盤生意，唔縮細規模。
呢個仍然係2026年最重要方向。
2）目前最大壓力主要來自早前馬鞍山項目影響，令公司喺融資同整體規劃上需要更審慎前行。不過我哋會一步一步調整，希望下半年逐步改善。
3）荔枝角舊舖已結業，但我哋冇離開荔枝角。
相反，我哋已經喺同區重新搵咗新舖：
📍麗新商業中心 G14｜已開業
📍長沙灣廣場｜裝修中，預計9月頭開業
特別感謝團隊同新業主配合，由知道需要搬遷到完成開舖，只用咗14日就完成同區重開，真係非常不容易。🙏🏻
4）上環分店成功留低。
原本8月初租約期滿準備離場，最後一刻同業主達成共識（即係成功減到啲租），續約3個月，目前正常營業中。希望之後可以再延續落去。
5）有媒體幫我哋數咗今年已經執咗八間分店，今年確實有較多分店因租約或成本問題需要調整，比我哋預期嘅多。
下一間即將結業嘅係大角咀港灣豪庭。
大角咀結業原因好直接：地方太大，人流唔夠，租金太貴，附近居民唔知道我哋收埋咗喺冒險樂園後面。
暫定營業至九月中，結業清貨8月19日開始
全場買滿$100即享七折
6）整體而言，我哋結業主要分兩類：
一類係Pop-up商場舖，租期完結自然離場；
另一類係正式租約期滿後，因租金未能達成合理共識而調整。
我哋希望租金能夠維持喺合理水平，將之前幾年簽落嘅貴租舖頭淘汰。
做生意唔係鬥捱貴租，而係要確保長遠可以健康營運。
又俾大家估吓，你哋覺得依家呢個市道，個別小業主定係大發展商容易傾啲？
7）文具佬同執笠倉正進行資源整合，由倉、物流到門市營運逐步優化，希望提升效率同穩定性，令到我哋更有條件喺逆市下面企穩陣腳。
8）🎉沙田廣場文具Lab已順利開業，多謝沙田街坊一如既往嘅熱烈支持。
我哋亦已確定另外兩間新分店地點，下半年我哋會繼續搵合適舖位，重點係「可長做、可健康經營」。
9）所以大家之後可能會見到：有舖結業、有舖搬遷、有新舖開張。但核心方向係一致：
唔係縮細，而係調整到更適合長遠發展嘅位置。
10）講完舖頭，再講吓我哋最直接感受到嘅消費變化。
而家全香港零售都面對緊一個幾明顯嘅情況：一到長假期，啲人好似突然消失晒咁。😂
大家寧願留返個Budget去旅行，平時唔急住用嘅嘢，就習慣咗上網慢慢買。
以前暑假一直都係文具舖傳統旺季，但今年我哋企喺舖頭，真係聽過好多次：
「媽咪上網幫你買啦。」
「下個禮拜去日本，到時先買筆袋。」
「唔好買住啦，日本買仲平……」
呢啲全部都係我哋前線真真正正聽到嘅說話。
所以消費唔係完全消失咗，而係大家更加識格價、更加有選擇，亦更加清楚自己啲錢想使喺邊。
11）面對消費降級同消費習慣改變，我哋都一定要跟住變。
我哋而家嘅策略係：款多量少、以快打慢。
唔再每一款貨入好多，而係不斷搜羅新款、加快轉款，等大家每次入到文具佬，都有機會見到一啲新嘢。
價錢方面，我哋亦會盡量做到貼近日本當地售價，希望大家唔使下下諗住「留返去日本先買」，喺香港見到鍾意嘅，都可以冇咁大壓力買得開心。
另一個方向，就係做一啲唔係周圍都有、甚至只有我哋先有嘅產品。
所以我哋會繼續自己創作，亦會搵唔同合作夥伴一齊開發產品。
例如之前連續兩年大賣嘅「知識就是力量」，大家買得好開心嘅粗口地鐵站明信片，又或者同Dustykid合作嘅心靈治癒系產品，都係我哋想繼續發展嘅方向。
既然單靠「賣同人哋一樣嘅貨」愈來愈難做，咁我哋就更加要諗：
有咩產品係值得大家專登嚟文具佬搵？
呢個亦會係我哋下半年好重要嘅方向。
12）文具佬團隊係：有錯就改，有問題就解決，有唔適合就調整，有機會就把握。
希望到年尾再Update時，可以同大家講——
我哋已經行得更穩。🫶🏻
多謝每一位支持文具佬、執笠倉同文具Lab嘅朋友。
你哋每一句「加油」，我哋都收到。
下半年，繼續努力。
新舖，會逐間同大家公布。💙
咁長嘅千字文你都睇到嚟呢度，證明你真係好愛我哋，多謝🫰🏻。
7嫂
