08/02/2026
ಮಕ್ಕಳ ಚಿತ್ರಕಲೆಗೆ ಹೇಳಬೇಕು ಭಲೇ ಭಲೇ!!
ಮಗಳು ತನ್ನ ಚಿತ್ರಕಲೆ ಪುಸ್ತಕದಲ್ಲಿ ಇಂದಿನ ಚಿತ್ರ ತೋರಿಸುತ್ತಿದ್ದಳು. ಹಾಗೆಯೇ ಪುಸ್ತಕ ಮುಚ್ಚಿಡುವಾಗ ಮೊದಲನೇ ಪೇಜಿನ ಒಂದು ಸುಂದರ ವಿಷಯ ಗಮನಕ್ಕೆ ಬಂತು. ಪುಸ್ತಕದ ಸೂಚಿಯಲ್ಲಿ ಪ್ರತಿಯೊಂದು ಚಿತ್ರದ ಮುಂದೆ ದಿನಾಂಕ, ಒಂದು ಚಿಕ್ಕ ಶೀರ್ಷಿಕೆ ಮತ್ತು ಅದರ ಪಕ್ಕದಲ್ಲಿ ಹೆಮ್ಮೆಯಿಂದ ಬರೆಯಲ್ಪಟ್ಟ ಅಂಕ — 100ರಲ್ಲಿ 100! ಅವಳ ಪಾಲಿಗೆ ತನ್ನ ಪ್ರತಿಯೊಂದು ಚಿತ್ರವೂ ಸಂಪೂರ್ಣ, ಪ್ರತಿಯೊಂದು ಪ್ರಯತ್ನವೂ ಯಶಸ್ಸು!
ಮಕ್ಕಳಿಗೆ ಸ್ವಾಭಾವಿಕವಾಗಿ ತಮ್ಮ ಬಗ್ಗೆ ಸಂಪೂರ್ಣತೆ ಮತ್ತು ಆತ್ಮವಿಶ್ವಾಸದ ಭಾವನೆ ಇರುತ್ತದೆ.. ನಮ್ಮಂತವರು (ಪಾಲಕರು) ನೋಡಿದರೆ ಮಕ್ಕಳ ಚಿತ್ರಗಳಲ್ಲಿ ಏನಿಲ್ಲ ಎಂದರೂ 1-2 ತಪ್ಪುಗಳು, 5-6 scope for improvment ಹುಡುಕಿ ಆರಾಮದಲ್ಲಿ ಹೇಳಬಹುದು, ಹೇಳುತ್ತೇವೆ ಕೂಡಾ! ಏಕೆಂದರೆ ನಾವು ಟ್ಯಾಲೆಂಟ್ ಕಾಂಪಿಟಿಷನ್ ಜಿದ್ದಿಗೆ ಬಿದ್ದಿರುತ್ತೇವೆ, ನಮ್ಮ ಮಕ್ಕಳ ಚಿತ್ರಗಳು ಬೇರೆ ಮಕ್ಕಳಿಗಿಂತ ಹೆಚ್ಚು ಸುಂದರವಾಗಬೇಕು ಎಂಬ ಹಪಹಪಿಯಲ್ಲಿ 'ಮಕ್ಕಳು ಚಿತ್ರಗಳನ್ನು ಬರೆದಿದ್ದಾರೆ' ಎಂಬ ಸಣ್ಣ ಸಣ್ಣ ಸಂತೋಷವನ್ನು ಸಂಭ್ರಮಿಸುವುದನ್ನೇ ಮರೆಯುತ್ತೇವೆ. ಹೊರಗಿನ ಮಾತುಗಳು - ಸರಿಪಡಿಸುವಿಕೆ, ಹೋಲಿಕೆ, ಅಥವಾ ಅಜಾಗರೂಕ ಟಿಪ್ಪಣಿಗಳು, ಅವರ ಆ ಸಂತೋಷದ “100” ಅನ್ನು ನಿಧಾನವಾಗಿ ಅನುಮಾನಕ್ಕೆ ತಳ್ಳಬಹುದು. ಆ ಕ್ಷಣದಲ್ಲಿ ಅರಿತುಕೊಂಡದ್ದು, ಎಂಬುದು.
ನಾವು ಪೋಷಕರು ಪದೇ ಪದೇ ನೆನಪು ಮಾಡಿಕೊಳ್ಳಬೇಕಾದ ವಿಷಯ :
ಮಕ್ಕಳು ತಮ್ಮ ಸೃಜನಶೀಲತೆಯನ್ನು ಆರಂಭದಲ್ಲೇ ಸಂಪೂರ್ಣ ಆತ್ಮವಿಶ್ವಾಸದಿಂದ ವ್ಯಕ್ತಪಡಿಸುತ್ತಾರೆ. ಚಿತ್ರಕಲೆ ಹಲವಾರು ಬಾರಿ ಮಕ್ಕಳಿಗೆ ತಮ್ಮ ಭಾವನೆಗಳನ್ನು ಅರಿಯಲು ಮತ್ತು ಮನಸ್ಸನ್ನು ಶಾಂತಗೊಳಿಸಲು ಸಹಾಯ ಮಾಡುವ ಒಂದು ಮಾರ್ಗ. ಆ ಚಿತ್ರಗಳ ಮೌಲ್ಯವು ಅದರ ನಿಖರತೆಯಲ್ಲಿ ಅಲ್ಲ, ಅವರು ಚಿತ್ರಿಸುವಾಗ ಕಾಣುವ ಸಂತೋಷ, ಶಾಂತಿ ಮತ್ತು ಆತ್ಮವಿಶ್ವಾಸದಲ್ಲಿದೆ..ಅವರು 'ಪ್ರಯತ್ನಿಸುತ್ತಿದ್ದಾರೆ' , ತಮ್ಮನ್ನು 'ವ್ಯಕ್ತಪಡಿಸುತ್ತಿದ್ದಾರೆ' ಮತ್ತು ಅದರಲ್ಲಿ 'ಸಂತೋಷ' ಕಂಡುಕೊಳ್ಳುತ್ತಿದ್ದಾರೆ - ಇದೇ ಮುಖ್ಯ, ಉಳಿದ ಎಲ್ಲವೂ ದ್ವಿತೀಯ!
