06/09/2026
රුමේෂ් තරංග බ්රසල්ස් හි දියමන්තිය වූ වගයි
ශ්රී ලංකා ක්රීඩා ඉතිහාසයේ ඓතිහාසික දිනයක් සටහන් කරමින් රුමේෂ් තරංග පතිරගේ සුළු මොහොතකට පෙර 2026 ඩයමන්ඩ් ලීග් හෙල්ල විසි කිරීමේ ශූරතාවය ජයග්රහණය කිරීමට සමත් වුණා.
ශ්රී ලංකා මළල ක්රීඩා ඉතිහාසයේ කිසිම ක්රීඩකයෙක් හෝ ක්රීඩිකාවක් ඩයමන්ඩ් ලීග් ශූරතාවය ජයග්රහණය කිරීමට හෝ අඩුම තරමේ ඩයමන්ඩ් ලීග් අවසන් තරගයටකට සහභාගී වීමටවත් සමත් වුණේ නෑ.
රුමේෂ් අද ඉතිහාසය අලුතෙන්ම ලියන්නේ 2026 ඩයමන්ඩ් ලීගයේ ශ්රී ලංකා දියමන්තිය බවට පත් වෙමින්.
ශ්රී ලංකා ධජය බ්රසල්ස් හි ඉහළටම එසවෙද්දී රුමේෂ් තරංගගේ නම ලෝක මළල ක්රීඩාවේ දිදුළන්නේ අද ඩයමන්ඩ් ලීගයේ දියමන්තිය වුණා වගේම තමයි.
රුමේෂ් තරගයට බලාපොරොත්තු වූ තරම් සාර්ථක ආරම්භයක් ලබා නොගත් අතර පළමු විසි කිරීම් ද්විත්වය අවසන් වද්දී ඔහු 3 වන ස්ථානය දක්වා පසුබැස සිටියා. ඒ කෙශෝන් වෝල්කොට් ට සහ ඇන්ඩර්සන් පීටර්ස්ට පිටුපසින් සිටිමින්.
නමුත් තමන්ගේ තුන්වන විසි කිරීමෙන් නැවත වතාවක් රුමේෂ් තරංග තමන්ගේ රිද්මය සහ මේ වසරේ විශිෂ්ටතම හෙල්ල විසි කිරීමේ ක්රීඩකයා තමන් වන්නේ ඇයිද කියා නැවතත් පෙන්නුම් කළා. ඒ මීටර් 89.04 ක දැවැන්ත විසි කිරීමක් වාර්තා කරමින්.
මේ විසි කිරීම ආසන්නයට හෝ පැමිණියේ පෝලන්තයේ වැග්නර් ඩේවිඩ් පමණයි. ඔහු මීටර් 87.47 ක දුරක් සටහන් කළා. නමුත් එය රුමේෂ්ට අභියෝගයක් නම් වුණේ නෑ.
රුමේෂ්ගේ මීළඟ විසි කිරීම් ද්විත්වය මීටර් 85.96 ක් සහ මීටර් 85.76 ක් විදිහට සටහන් වුණා. ඒ විසි කිරීම් ද්විත්වය පවා මීටර් 85 ඉක්මවා යන්නේ ඔහු දැනට හෙල්ල විසි කිරීමේ ඉසව්වේ ලෝකයේ මොන තරම් ඉහළින් ඉන්නවාද කියලා තවදුරටත් පසක් කරමින්.
අවසන් විසි කිරීමේදී හෝ රුමේෂ්ගේ මීටර් 89.04 ට අභියෝග කරන්නට කිසිවෙකුත් සමත් වූයේ නෑ. ඔහු 2026 ඩයමන්ඩ් ලීග් මළල ක්රීඩා තරගාවලියේ හෙල්ල විසි කිරීමේ ශූරයා බවට පත් වුණා.
සමස්ථ තරගවාරය පුරාවටම ජයග්රහණයන් එක දිගට ලබා ගනිමින්, ලකුණු සටහනේ පවා තමන්ට ඉදිරියෙන් ගමන් කරන්නට කිසිවෙකුටත් ඉඩ නොදෙමින්, අවසන් මහා තරගයේදී පවා තමන්ගේ ආධිපත්යය පෙන්වමින් ක්රීඩා කරපු රුමේෂ් සත්ය වශයෙන්ම විශිෂ්ටයෙක්.
ශ්රී ලංකාව වගේ රටකින් සියවසකට විතර පාරක් බිහිවන විශිෂ්ටයෙක්.
රුමේෂ් තරංග අද නැවත වතාවක් ශ්රී ලංකා ධජය ආඩම්බරයෙන් මළල ක්රීඩාවේ ඉහළින්ම ඔසවලා තියන්න සමත් වුණා. ඔහුට තව ශ්රී ලංකා ධජය ඉහළටම ඔසවන්න සෑහෙන්න කාලයක් තියෙනවා.
රුමේෂ් තරංග, ඔබට උණුසුම්ම සුබ පැතුම්. රටක් විදිහට මේ රටට අවශ්ය ජයග්රහණ තව ගොඩක් මේ විදිහටම දිනවලා දෙන්න හැකියාව ඔබට ලැබිය යුතුමයි.
