02/02/2026
Då er alle ranunklane og anemonene sette til forspiring. Nokre få blomsterfrø er sådd, og resten kan vente.
Nå er eg klar for ferie. Det blei lite ferie på meg i fjor sommar, så i morgon reiser eg til English L'Abri. Her skal eg vere vel ei veke; koble av, lese, skrive, møte nye menneske, samtale om laust og fast og om større spørsmål i livet, lade opp og logge av.
Om de sender meg meldingar eller e-post i løpet av veka som kjem, må det difor vente ei stund på svar.
Eg er tilbake og i gang med arbeidet igjen onsdag 11. februar, klar for ein ny sesong.
Eg gler meg til det som ligg framfor: til å så, venta på at det spirer, til å passe på dei små spirene, planta dei ut og sjå dei veksa og setja knoppar som etter kvart er klare til å plukkast, til å plukka blomar og vinde bukettar og ikkje minst til mange gilde menneskemøter.
Eg håpar du og mange andre også er klar for ein ny sesong på Anda blomstergard, til å stikka innom blomsterutsalget når det er ope, til å koma på sjølvplukk, såkurs eller bukettkurs, til å bestilla blomar til å gje bort, til å bli bukettabonnentar eller til å kjøpa blomar til konfirmasjonar, fødselsdag og bryllaup. Vi håpar å ha dei første blomane klare for salg i midten av april.
Men nå er det altså ferie først. Ønskjer alle våre følgjarar ei fin vinterveke mens vi ventar på våren.
