23/11/2024
شوق ہے نیا نیا، تو سب سے پہلے دھنیا::..
السلام علیکم باغبانوں،
امید ہے آپ سب خیریت سے ہونگے, نئے باغبانوں کو عموما سب سے پہلے ہرا دھنیا لگانے کا مشورہ دیا جاتا ہے۔ ایک تو یہ گملے میں باآسانی لگایا جاسکتا ہے دوسرا اس کا بیج ہر گھر میں موجود ہوتا ہے یعنی ثابت دھنیا۔
مگر جناب یہ سب کے لیئے اتنا بھی آسان نہیں ہوتا اکثر باوجود کوشش کے بیج ہی نہیں اگتا یا اگ تو جاتا ہے مگر دھنیا آنے سے پہلے ہی کمزور سی کونپلیں لیٹنا شروع ہو جاتی ہیں اور بالآخر مر جاتی ہیں۔
دھنیا لگاتے ہوئے کچھ باتوں کا دھیان رکھیں تو انشاءاللہ صحتمند اور وافر دھنیا ہر وقت گھر میں خوشبو بکھیرتا رہے گا تو کریں بسم اللّٰہ۔
سب سے اہم بات گملے کی تیاری ہے، کھاد اور بالو مٹی کا مکسچر بہت اچھی طرح نرم کیا ہوا ہونا چاہیئے، ابھی ہم کسی کمپوز یا مشکل ناموں والی کھاد یا کیمیکل کی بات ہی نہیں کررہے سادہ سی گوبر ملی مٹی جو باآسانی کسی بھی نرسری سے مل جائے وہ کافی ہے۔ گملے کے سوراخ پر کوئی پتھر اس طرح رکھیں کہ سوراخ سے مٹی باہر نہ گرے اور پانی بالکل "نہ" رکے اور رس رس کر باہر نکل جائے یہ بے حد ضروری ہے۔ اب گملے میں مٹی بھر لیں اتنی کہ کنارے سے ڈیڑھ انچ نیچے رہے۔ گملے کو اچھے سے تھپتھپائیں تاکہ کہیں کوئی خالی جگہ رہ گئی تو وہاں بھی مٹی پہنچ جائے۔
اب کسی لکڑی یا پیالے یا کوئی بھی چپٹی چیز سے مٹی کو ہموار کرلیں اور ہلکا ہلکا سا دبا لیں تاکہ لیول ہو جائے۔
ثابت دھنیے کے بیج کسی نرم کپڑے میں بچھا لیں اور بیلن کی مدد سے اس کو ھلکے ھاتھوں سے بیل لیں ہمیں بیج کو درمیان سے دو ٹکڑے کرنے ہے اس طرح باآسانی ہو جائے گا، اب یہ بیج چٹکی میں جتنے آجائیں گملے میں مٹی پر رکھتے جائیں ہر چٹکی کے بیچ کچھ کچھ فاصلہ رکھ لیں اچھی طرح سے بیج رکھنے کے بعد دوبارہ کسی چپٹی چیز سے ان بیجوں کو ہلکے سے اتنا دبائیں کہ یہ مٹی میں بس جم جائیں، اتنا مت دبائیے کہ بالکل دفن ہوجائیں۔
اب ان بیجوں پر اگر تو کھاد ہے تو بہت اچھے کیونکہ یہ وزن میں مٹی کے مقابلے میں ہلکی ہوتی ہے ورنہ مٹی کی تہہ ایسے لگائیں کہ بیج بھی اتنے ڈھک جائیں کہ پانی کی پھوار سے باہر نظر آنا شروع نہ ہوجائیں۔ اب بالکل باریک والے اسپرے پمپ سے پھوار کریں پانی کھڑا ہونے لگے تک جائیں، جزب ہو جائے پھر اسپرے کریں کھڑا ہو پھر رک جائیں یہاں تک کہ گملے کے نیچے سے پانی ٹپکنا شروع ہو جائے تو بس کردیں۔
اب بہتر یہ ہے کہ گملا کسی ایسی مٹی کی یا پلاسٹک کی پلیٹ میں رکھیں جیسی سالن کی گہری والی پلیٹ ہوتی ہے، آئیندہ پانی اوپر سے دینے کے بجائے صرف پلیٹ کو بھریں مٹی خود پانی چوس کر اوپر تک پہنچائے گی۔ گملا ایسی جگہ رکھیں جہاں صبح کی تین سے چار گھنٹے کی دھوپ ملے اور دن بھر خوب روشنی اور۔۔۔۔۔اور بس۔
پانچ سے سات دن کا انتظار کریں، کونپلیں پھوٹیں گیں پھر سائیں والی مونچھوں جیسی پتیاں نکلیں گی موسم ٹھنڈا ہورہا ہے جیسے جیسے کونپلوں پر پتیاں بڑھیں دھوپ کا وقت بڑھا دیں، گھاس آگے اسے نکال دیں، پانی پودوں کو صرف اس وقت دیں جب وہ خود مانگیں وہ نڈھال نظر آئیں تو پلیٹ میں پانی بھر دیں کچھ دیر کے بعد وہ پھر خوش باش جھومتے ہوئے نظر آئیں گے۔
جب دھنیا آگ جائے تو تھوڑا سا اپنے پڑوس میں ضرور بھیج دیں۔۔۔ بانٹنے سے بڑھتا ہے، اور آپ یقیناً اپنی ہر نعمت بڑھانا چاہیں گے۔ اگلی دفعہ گملے بڑھالیں کچھ اپنے لیئے کچھ دوسروں کے لیئے۔
