A.Alsherbini

29/05/2026

بعد تسوية عيش الساوردو بسيبه يبرد تماما قبل ما اقطعه عشان بيكون لسه بيكمل تسوية ببطئ وعشان ما يعجنش، بعد ما بقطعه لنصين باخد كل نص واحطه جوا كيس بلاستيك واتأكد اني قفلته كويس جدا عشان يحتفظ بريحته وطعمه.
لما بحب استخدمه بطلعه قبلها بساعة حسب الجو برا على الكاونتر عادي او قبلها بليلة فالتلاجة، وطبعا بقطع منه الشريحة اللي هستخدمها والباقي بحطه جوا الكيس فالتلاجة تاني عشان يحتفظ برطبته اطول مدة ممكنه

#ساوردو

27/05/2026

بيتزا مارجريتا بالساوردو ✨

يناسب 3بيتزا وسط
القادير :
-500 جرام دقيق عالي البروتين
-350 جرام ماية
-100 جرام خميرة طبيعية
-10 جرام ملح
-15 ملم زيت زيتون (13.8)جرام

الوصفة:
- الاول بنقلب الخميرة مع نص او اقل من كمية الماية لحد ما تذوب فالماية وبعدين نضيف الدقيق وباقي كمية الماية ونقلبهم بشويش بعد كدا نبدء بالعجن بالايد بردو براحة يا دوب نلم الماية والدقيق فبعض وبعدين نسيب العجينة ترتاح وتمتزج فبعضها 40 دقيقة.
- نضيف الملح ونعمل شد وطي وبعدين نضيف الزيت ونعمل شد وطي وعجن بشويش جدااا (نضيف كل من الملح والزيت على حدا مش مع بعض عشان نعرف نعجن كل مرحلة كويس )
- نسيبها ترتاح نص ساعة ونكرر الشد والطي 3 جولات بين كل جولة والتانية 30 دقيقة (عدد الشد والطي نفسه فالمرة الواحدة مايزيدش عن خمس شذ وطي )
- نسيبها تخمر حسب درجة حرارة الغرفة انا سيبتها ساعتين درجة الحرارة عندي كانت فحدود 27c
- نقسمها ونشكلها ونحطها فعلب محكمة الغلق نضيف جوا العلب زيت
- نحطها فالتلاجة ليلة او اكتر انا سيبتها 48 ساعة ماكنتش فاضية اعملها بعد ليلة واحدة بس
- نرش سميد ناعم ونشا ونطلعها ونفردها بالايد بس قبل اضافة المكونات نحطها على ورق زبدة عشان نعرف ننقلها للصنية او حجر البيتزا لانها بتكون بتلزق جداا (نضيف المكونات اللي حابينها)
- نسخن الفرن قبلها ب20 دقيقة ندخلها يكون على اعلى درجة حرارة ونحط صينية فيها نص كوب ماية لكل بيتزا
- بتقعد فالفرن حوالي 20 دقيقة بس

25/05/2026

المقادير :
- 230 ج دقيق ابيض عالي البروتين
- 50 ج دقيق القمح الكامل (بر)
- 120 ج حليب
- 15-20 ج عسل
- 25 ج سمنة او زبدة قليلة الملح
- 60 ج خميرة طبيعية نشطة
- 4 ج ملح
- بيضة صغيرة
- حبوب كتان وشيا منقوعيين

الوصفة :
- بنخلط الحليب والبيض والعسل والسمنة وبعدين نضيف الخميرة ونخلطها معاهم.
- بنضيف الدقيق ونخلطهم كويس وبعدين نعجنهم ونسيبهم 40 دقيقة
- بعد 40 دقيقة بنضيف الملح ونعمل اول شد وطي ونضيف البذور المنقوعة لو فيهم ماية نصفيهم لكن لو تشربوا الماية نحطهم زي ماهما وبعدين نغطيها ونكرر الشد والطي تلات جولات بين كل واحدة والتانية 30 دقيقة
- بعد اخر جولة نسيب العجينة تخمر حسب حرارة الغرفة حتى يوصل حجمها لاقل من الضعف بشوية
- نشكلها ونحطها فالقالب ونغطيها كويس ونحطها فالتلاجة لتاني يوم
- نسخن الفرن على 240c وندخل القالب بدون تغطية مع صينية فيها ماية قد كوب ونص تقريبا وممكن نرش الوش ماية
- وقت التسوية بيكون لمدة من 25 ل 35 دقيقة حسب حرارة وقوة الفرن
- دهنت الوش دهنة سمنة بالفرشة وهو سخن
- بنسيب التوست يبرد تماما بعدين نقطعه وبألف هنا 🫶🏼

#ساوردو ⁩⁩⁩⁩

24/05/2026

مهما كانت نتيجة الساوردو ف اتبسطوا بالprocess وال progress وكل مرة هتعملوه هتتعلموا وكل مرة هتغلطوا هتتعلموا بردو .. اجمل حاجة ان الواحد يعمل حاجة بحب والاجمل انه يبقى واثق انها 100% هتدخل الجسم من غير اي ضرروانه يبقى واثق وعارف كل مكون فبه إيه صحتكم ..
be proud of what you do for your body and your health 🫶🏼✨

#ساوردو

22/05/2026

بيض مقلي بالافوكادو والشيدر مع عيش الشيباتا اللي عملناه سوا قبل كدا ✨
Scrumbled eggs with avocado and cheddar cheese and the ciabatta we made together before ✨🫶🏼😋

#شيباتا

21/05/2026

عملت الساوردو بالكاكاو والاسبريسو بس الوصفة الصراحة حسيت محتاجة اشتغل عليها اكتر كطعم كان حلو بس الcrumbs ماكنتش موجودة خالص واظن الاسباب كان حاجتين نسبة الماية والتخمير ف هعمل تجارب تانية لسه ..
بس لو عايزين الوصفة اوي يعني اكتبولي فالcomments 👇🏼🙊

#ساوردو

21/05/2026

اكتر مشكلة ممكن تواجهنا مع الساوردو او اي مخبوزات معمولة بالخميرة الطبيعية هيا انها بتنشف بسرعة بس اللي متعرفهوش إن الترطيب مش بس بيساعد على مرونة المخبوزات لأ دا كمان بيساعد على تمدد المخبوزات قبل ما القشرة الخارجية تنشف ولمعان القشرة الخارجية بدل ما تكون مطفية والاهم انها بتساعد لنقل الحرارة للب المخبوزات بشكل اسرع ف بيخليه رطب من جوا وطري..

طيب إيه الحل؟؟
الحلول كتيره 👇🏼
- حمام ماية يعني صينية قديمة عندك بتحطي فيها تقريبا كوب ماية وتسيبيه يتبخر وقت تسوية المخبوزات لو هتخبزيه مكشوف فالفرن بدون تغطية مثلا صنية او حجر بيتزا او طاجن او بايركس من غير غطا .
- بخاخ ماية تبخي وش المخبوزات كويس جداا والطريقة دي مناسبة لو مش حابة تستخدمي صينية فيها ماية مثلا مع القراقيش عشان تحتفظي بنسب القرمشة او لو هتحطيه ف بايركس او طاجن مع تغطية.
- قطع تلج بحب استخدمها لو هحط المخبوزات فحلة استانلس مثلا بحط فحدود من 4 ل 6 قطع تلج مع الساوردو فحلة الاستانلس واغطيه كويس
- تبليل حجر البيتزا بحب اعمله ك مساعدة مع صنية الماية او حمام البخار ك إضافة

قولولي انهي طريقة ممكن تحبوها وتناسبكم اكتر 🤔👇🏼

#ساوردو

19/09/2025