24/04/2026
"استثمارك في قروش بيتك هو أول استثمار في نجاحك كصاحبة عمل."
"التوفير هو فن اختيار الأولويات، عشان نعيش حياة كريمة ومستقرة "
تعالوا نبدأ سوا رحلة ميزانية الشهر..
حا اقسمها ليكم لتلاتة اجزاء
الجزء_الأول: كيف تعملي ميزانية شهرية "بذكاء"؟
الميزانية ما تقييداً لحريتك !! لا.. هي "خارطة طريق" وبداية التوفير.. عشان تعرفي بتودي قروشك وين؟؟؟ وتبدئ تعملي حسابك للصرف يا غالية.
قاعدة (50-30-20)
بتجيبي دخلك مهما كان كم..سامعاني يا السمحة وبتقسميهو زي ما بقوليك
50% نص الدخل بتختيهو في ظرف للاحتياجات الأساسية (إيجار، فواتير الكهرباء والموية وتموين البيت)
30% للطوارئ
20% توفير
يعني انا دخلي ٢٠٠ ألف جنية مثلا اقسمها كيف؟؟
١٠٠ الف جنية للإحتياجات الأساسية
٦٠ الف طوارئ
٤٠ ألف توفير
#نظام_الظروف: قسمي القروش بنفس الترتيب حسب مبلغ الدخل ممكن تبدلي ال٦٠ ألف مكان ال ٤٠ الف حسب الحوجة.
يلا ال ١٠٠ ألف قسميها قسيم المرارة
ظرف للتموين- ظرف للخضار - ظرف للعيش وهكذا
ولما تتابعي معاي وتتعلمي توفري في قروش الخضار والعيش وووو حا تشيلي البفضل في الظرف وتختيه مع مبلغ التوفير.
ليه اخت المبالغ في ظروف او أظرف؟
ده بيمنعك تسحبي من ميزانية بند علي التاني
وبيعلمك تزيدي شنو وتنقصي شنو للشهر الجاي..
اها انا دخلي ١٠٠ الف او اقل برضو قسمي إحتياجاتك الاساسية في ظروف: ظرف الخضار ، ظرف العيش ، ظرف التموين ، ظرف الفواتير وهكذا.
#تدريب عملي بسيط جيبي ورقة وقلم وسجلي مصروفاتك لليوم واحتفظي بالورقة.
المعانا تعلق وترفع يدها فوق واعرف سيدات القوة منو؟؟ والعايزين الدهب والقروش والبزنس منو؟؟
